CEBU, Philippines - Usa ka 52-anyos nga lalaki kinsa naghambin og sakit sa atay naghikog sulod sa iyang kwarto sa Zone 5 barangay Central Biasong, dakbayan sa Talisay sa miaging hapon.
Si Eduardo Briones, migamit og laso sa blouse nga gihikot sa iyang liog samtang ang pikas tumoy niini gigaid sa sagbayan sa balay.
Sa imbestigasyon nila ni SPO4 Daniel Tarucan, PO3 Benedicto Lasque ug PO3 Ferdinand Pablo si Briones nasuta nga si Briones dugay na nga naglubog sa banig tungod sa sakit sa iyang atay.
Si Cornula Briones, 30, anak sa naghikog nagkanayon nga iya pang gipapanihapon ang iyang amahan aron busog kini nga matulog.
Apan nagkalawom ang kagabhion gibati siya og kabalaka kay naghukdong ra sa iyang higdaanan ang iyang amahan nga wala matulog.
Tungod sa maong kabalaka, nianang pagka- alas 2:50 miadto siya sa iyang mga silingan nga sila si Marissa Dimasale ug Richel Nindas aron magpatabang basin may mahimo kini aron makatulog ang iyang amahan. Apan dihang mibalik siya og saka sa ilang balay mao nalay iyang nakita nga nagbitay na ang iyang amahan.
Gumikan niini nangayo og tabang si Cornula sa buhatan sa City Social Welfare kinsa mipadala usab dayon sa Talisay Rescue Emergency Action Team (TREAT) nga maoy mipamatuod nga patay na si Briones sa maong higayon. (BANATNEWS)