Senior may special voting center

CEBU, Philippines - Gitinguha ni 6th District Congressman Gabriel Luis "Luigi" Quisumbing nga makabotar og sayo ang mga Senior Citizen(SC) ug ingon man ang mga Persons With Disabilities (PWD) sa election unya sa 2013.

Kini ang unod sa giduso nga balaodnon ni Quisumbing nga mao ang House Bill 5963 nga gititulohan og "An Act Providing for Early Voting of Senior Citizens and Appropriating Funds therefore" ug House Bill 5964 nga gititulohan usab og "An Act Providing for Early Voting of Persons With Disabilities (PWD) and Appropriating Funds therefore."

Sa maong mga balaodnon, si Quisumbing misugyot nga ang Commission on Elections(Comelec) kinahanglan nga makig-alayon sa mga Local Government Unit(LGU), Department of Health(DOH) ug Department of Interior and Local Government(DILG) alang sa pagmugna ug pagdesinyo og sistema ug mga hinabang alang sa mga SC ug PWD.

Si Cong. Quisumbing mitumbok usab nga ang COMELEC gitahasan sa pagtudlo og centro nga botohanan alang sa mga SC ug PWD nga konbenyente ug sayon alang kanila.

Ang botasyon alang sa Senior Citizen ug PWD himuon usa ka adlaw sa dili pa ang gitakdang piniliay uban ang kasiguroan nga ang polling place alang kanila kompleto og mga kasangkapan sama sa communication, visual ug ubang matang nga ikatabang sa mga tiguwang nga botante.

Gipasabot ni Quisumbing nga sa milabay’ng piniliay niadtong tuig 2010 daghang mga tiguwang ug may apan sa panglawas ang mibiya sa lawak botohanan nga wala makabotar kay wala  kaagwanta sa kataas sa linya sa mga botante nga mga batan-on ug maayo og lawas.

Gumikan sa maong kahimtang nahikawan sila sa katungod sa pagtuman sa usa ka sagradong katungdanan nga mao ang pagbotar.

Maoy hinungdan nga gumikan sa masulob-ong kasinatian, gisang-at ni Quisumbing ang maong balaodnon aron katabangan ang mga Senior Citizen ug ang mga PWD nga makabotar sa umaabot nga mga piniliay.

Alang kang Quisumbing nga ang paghimo og mga pamaagi sa pagmontar og mga mekanismo kinahanglang andamon aron hapsay ug malinawong makabotar ang mga     SC ug may PWD    sa umaabot nga mga election.(/WC)  (BANATNEWS)