Bay nga way tawo ugdaw

CEBU, Philippines - Naugdaw ang duha ka andana nga balay sa sunog nga miulbo didto sa barangay Tapilon lungsod sa Daanbantayan niadtong Huwebes sa alas 5:40 sa hapon. Ang maong balay    gipanag-iya ni Recardo Arriesgado Sr., apan wala kini magpuyo sa maong balay.

Si PO2 George Banatasa sa Daanbantayan Police Station mibutyag sa Banat News nga ang maong sunog midanyos og P100 mil. Padayon pang gisubay ang tinubdan sa sunog nga didto kuno magsukad sa ikaduhang andana sa maong balay nga gigama sa semento ug kahoy.

Matud pa ni P02 Banatasa nga si Kapitan Artojo Conejos sa barangay Tapilon maoy nagpahibawo sa ilang buhatan ug sa kabomberohan kalabot sa maong alarma sa sunog. Daling mirespondi ang kabomberohan sa Daanbantayan ug ang kabomberohan sa Kawit, Medillen.

Hinuon walay gikareport nga naangol ug nakalas sa maong sunog . Sa paghimo ning balita ang kabomberohan sa Daanbantayan padayon pa sa ilang imbestigasyon kun nganong miulbo ang kayo sa maong balay nga wala may nagpuyo ug giputlan usab kini og kuryente.  (BANATNEWS)