Bata natawo nga way utok

CEBU, Philippines - Patay ang usa ka batang lalaki nga giingong natawo nga walay utok didto sa maternity ward sa Vicente Sotto Memorial Medical Center (VSMMC) niadtong Lunes sa kaadlawon.

Si Lourdes Natad, 48, lumad nga taga Sitio Nangka, barangay Tuyan, siyudad sa Naga,   apohan sa maong bata kinsa kagahapon lang mipahibawo sa Banat News miila sa inahan niini nga si Rose Ann Gupio, 19, taga lungsod sa Compostela nga kapuyo sa iyang anak nga si Ranil Natad, hingkod.

Gani wala pa kahatagi og ngalan ang bata tungod kay dali kaayo kining nabugtoan sa kinabuhi human matawo.

Si Lourdes miingon nga giprangkahan siya pagsulti sa usa ka doktor kansang ngalan iyang gipugngan nga miingon nga dili gyud mabuhi ang iyang apo kay natawo kini nga walay utok.

Sumala ni Lourdes nga si Ranil maoy nagbantay sa pagpanganak ni Gupio, apan human niini ipakatawo ang bata mibiya siya si Ranil kay namalit og mga tambal apan nalangay siya sa pagbalik tungod kay nangita pa siya sa mga tambal nga giresita sa doktor nga nag-atiman sa nanganak. Mao nga human manganak ang iyang kapuyo og alas 3:30 sa kaadlawon, milakaw dayon siya sa pagpangita og tambal ug nahibalik siya niana nang alas 5:00 sa kabuntagon.

Apan nakurat nalang sa paghiabot niya didto sa nursery station kay gisultian siya sa nurse nga nag-atiman didto nga patay na ang iyang anak kay walay tagtungod nga nag-atiman niini human ihimugso.

Gawas kaniya kang Ranil, may lain usab nga amahan nga midangoyngoy kay namatyan gihapon   og anak didto   sa nursery station   sa maong higayon. 

Si Lourdes nagkanayon nga segun   sa iyang nakita sa nursery station duha lamang ka mga nurse ang nag-atiman dul-an sa usa ka gatos ka mga bata nga bag-ong nangatawo.

Apan labi siyang nakurat dihang gisultihan siya sa usa ka doktor kansang ngalan wala niya ibutyag nga miingon nga dili gyud mabuhi ang maong bata kay natawo kini nga walay utok.

Matud pa ni Lourdes nga ang maong doktor wala na makapasabot kaniya kun unsay mga sirkumstanya sa nagpaluyo sa gidangatan sa iyang apo nga natawo nga walay utok. Miingon usab si Lourdes nga wala gayud siya makakita sa hitsura sa nawong sa iyang apo gawas sa tibuok ulo niini niadtong pagkahimugso kay gipadali man kini pagpalubong didto sa sam-ang sa Naga.(/WC) (BANATNEWS)