Laing bus nadisgrasya 11naangol

CEBU, Philippines - Laing bus pasaheroan na usab ang nakasugat og aksidente nga miresulta sa pagkaangol sa napulo ka pasahero ingon man sa drayber niini human matagak sa kanal ang ilang bus sa barangay Pitalo lungsod sa San Fernando kagahapon sa buntag.

Ang aksidente nahitabo usa ka adlaw human sa pagkalimbuwad sa Calvo Bus Liner sa barangay Mainit siyudad sa Naga nga miangol og 28 ka mga pasahero. Ang laing bus pasaheroan nga nakasugat og disgrasya mao ang Alvios Mini bus nga dunay rotang Carcar -Cebu City nga gipanag-iya ni Mary Alvios nga gimaneho ni Danilo Navares, 41, nga usa sa naangol.

Samtang ang napulo ka mga pasaherong nakaangkon og mga pangos ug bun-og sa ilang kalawasan ug ulo mao sila si Alexander Abanggan, 54, Angelisa Soronio, 39, Conrada Dazo, 53, Roel Antipolo, 34, Elma An Anjales, 26, Loren Laude, 32 , Lilian Cabilano, 41, Corazon Zamante, 62, Nimfa Doropan, 56, ug Lucricio Lucedo, 56. Matud ni PO3 Julius Cesar Parages traffic investigator sa San Fernando Police dihang nahinabi sa Banat News mibutyag nga base sa ilang imbestigasyon paingon sa Carcar ang maong minibus dihang kalit kining nawad-an og kontrol sa manobela.

Gitug-an sa drayber sa mga polis nga samtang nagdagan kalit lang naputol ang koneksyon sa ligid ngadto sa manobela ug nagbuotbuot nalang kini og liko nga dili na niya makontrolar. Hangtud nga sila padulong sa konkretong kanal ug mitakilid pagkahagbung sa ligid nga miresulta sa pagkapakong sa mga pasahero tungod sa impact niini. Ang mga naangol nga pasahero daling gihatud sa Vicente Sotto Memorial Medical Center (VSMMC) sa dakbayan sa Sugbo. Ang drayber mitahan sa kapolisan. (BANATNEWS)