Opisyal sa PNP mokiha sa direktor sa PRO-7

CEBU, Philippines - Mopasaka og kasong administratiba ug kriminal ang usa ka opisyal sa kapulisan batok ni Police Regional Office-7 director Chief Supt. Marcelo Garbo ug sa Deputy Regional Director for Administration (DRDA) nga si Chief Supt. Samuel Yordan.

Ang mopasaka og kaso batok sa duha mao si Supt. Vicente Mersan Premne kinsa atua na madestino sa Zamboanga City.

Nasayran nga sa miaging gabii gibabagan sa gate diha sa PC Hills sa dili mominus 20 ka mga sakop sa Regional Public Safety Battalion (RPSB) si Premne dihang mosulod unta kini sa quarters. Sigun sa taho ang mga anak ni Premne na maoy nagpuyo sa quarters niini sa PC Hills hinungdan nga misulod kini sa maong dapit. Ang PC Hills maoy gipuy-an sa mga regional staff sa PRO-7 hinungdan nga misulod kini apan gibabagan.

Si Supt. Armando Radoc, Regional Police Community Relations Division (RPCD) sa PRO-7 nga nahinabi sa mga tigbalita kagahapon sa buntag nagkanayon nga sigun sa iyang nahibaw-an dunay policy nga ang makapuyo sa quarters diha sa PC Hills kadto rang mga regional staff nga nadestino sa PRO-7.

Apan si Premne dili na mahimong mopuyo diha sa PC Hills uban sa iyang pamilya sanglit atua naman siya nadestino sa Zamboanga.

Si Garbo nga atua karon sa lalawigan sa Bohol nga gikuhaan og reaksyon kabahin sa plano ni Premne nga pagpasaka og kaso mipadayag nga katungod kini ni Premne ug ni bisan kinsang mga opisyal diha sa PRO-7.

Apan siya mipasabot nga overstaying na si Premne uban sa iyang pamilya diha sa PC Hills ug labaw sa tanan dili na usab siya sakop sa PRO-7 sanglit atua naman kini nadestino sa Zamboanga City sulod na sa kapin duha ka buwan nga gikan kining nadestino sa Campo Crame. Matud ni Garbo ang quarters sa PC Hills alang ra sa mga staff sa PRO-7 diin ang nagbuot niini mao ang Regional Housing Board. Si Premne mipasangil nga dili makatarunganon ang gibuhat kaniya sanglit giputol na ang linya sa tubig sa iyang quarter diha sa PC Hills.

Giklaro hinuon ni Garbo nga walay nahitabong pagpang-harass sa mga sakop RPSB ngadto ni Premne.  (BANATNEWS)