Inahang nakigkunsabo sa bana sa anak gireklamo'g child abuse

CEBU, Philippines - Usa ka ginang ang mipasaka og kaso batok sa iyang inahan ug laing kaso batok sa iyang bana tungod sa pasangil nga nagkunsabo ang duha nga nakaingon sa pagkabungkag sa iyang pamilya.

Ang ginang mipasaka og 2-counts og kasong kalapasan sa Republic Act 7610 o Child Abuse batok sa iyang inahan tungod kay mao na kini ang sekretong gipadad-an sa iyang bana nga gipasangil niyang aduna nay laing karelasyong babaye, sa sustento sa ilang duha ka mga anak.

Sumala pa sa complaint-affidavit sa ginang, ang inahan niini nasayod nga dunay laing karelasyon ang iyang bana apan wala kini maghisgot kaniya ug nadiskubrehan niyang mao diay kini ang gipadad-an sa iyang bana sa sustento sa ilang mga anak.

Matud pa sa ginang gawas pa niini, gipasanginlan usab niya ang iyang inahan nga maoy naghimohimo og mga estorya sa mga silingan ug nga siya adunay laing karelasyong lalaki, butang nga iyang gihimakak.

Ang bana sa ginang nagtrabaho sa Middle East ug kaniadto magpadalhan kini og kwarta ug package kanila apan nadiskubrehan nalang niyang gawas kanila nagpadalhan diay usab kini sa laing babaye sukad pa niadtong 2007.

Nagduda ang ginang nga bisan nasayod ang iyang inahan sa pakigrelasyon sa iyang bana sa ubang babaye wala kini motug-an sanglit anha nalang kaniya ipaagi ang sustento sa mga apo niini.

Tungod niini midangop siya sa barangay diin gimandoan ang iyang inahan nga pasustentohan ang mga bata gikan sa kwartang gipadala sa ilang amahan apan giingong wala kini tumana sa inahan sa ginang. “The cutting off of communication as well as support is a deliberate ploy to get away with his infidelity. His infedility deprived me and my sons of what was rightfully ours,” matud pa ni Ornales.

Si Prosecutor II Maria Luisa Ratilla mirekomendar og P24 mil nga piyansa sa inahan sa ginang bugti sa temporaryo niining kagawasan.  (BANATNEWS)