Pagpatangtang sa OSC personnel di tinuod

CEBU, Philippines - Gihimakak ni Mayor Michael Rama ang isyu matud pa nga siya maoy nagpahulip sa pipila ka personnel sa Operation Second Chance (OSC) niadtong pipila ka buwan ang nilabay.

Sumala pa ni Rama nga dili siya makahilabot sa maong sentro sanglit duna kini kaugalingong management board.

Nasayran nga gipadayag ni Bise Mayor Joy Augustus Young nga si Rama maoy nagpatangtang sa mga karaang trabahante sa OSC kaniadto nga matud pa niya mao gyud untay suhito sa saktong pamaagi pagpadagan sa maong pasilidad.

Kahinumduman nga girelibohan ang walo ka mga jailguards sa OSC sa miaging adlaw human gireklamong nangulata sa kapin usa ka gatos nga mga minor offenders.

Napublikar kini dihang ang mga batang gi-rehab mi-hostage sa usa sa mga jailguards niadtong Domingo sa gabii ug Lunes sa kaadlawon gibuhian human sa negosasyon.

Hinuon nagpadayon pa ang imbestigasyon niini sa Bureau of Jail Management and Penology ug ang Police Advisory and Coordinating Council sa maong kaso.

Wala usab igsapayan ni Rama ang taho nga matud pa nga dunay dili taga siyudad nga minor offenders nga gibutang karon sa OSC tungod kay mas maayong makatabang ang siyudad sa kabataan .   

Nasayran nga 60 porsiyento sa dul-an sa 175 youth offenders sa OSC naggikan sa silingang mga lugar sa siyudad sa Sugbo.

Giingong 100 lang ang kapasidad sa maong pasilidad ug usa kini sa gipatun-an ni Rama kung unsa ang mahimong solusyon niini.

Samtang mohimo og imbestigasyon ang Commission on Human Rights -7 bahin sa reklamo sa mga bata batok sa mga jailguards sumala pa ni Atty. Alejandro Alonso ang direktor sa maong buhatan.

Sa report sa TV5 kagahapon, dunay gahom ang CHR nga makahimog linaing imbestigasyon sa maong kaso. Sa pagkakaron gipaabot nga ang social welfare office sa dakbayan maoy mouna og himo og lakang sa maong reklamo.(Uban sa report ni Rey Pasaporte/EIM)  (BANATNEWS)