May mga botikang di mohatag og diskwento sa mga bakol

CEBU, Philippines - Giawhag sa konseho sa siyudad sa Sugbo ang Department of Health (DOH) ug Bureau of Food and Drugs (BFAD) nga estriktuhon ang pag-monitor sa mga botika, klinika ug uban pa nga establisamento nga namaligya og tambal.

Sumala pa ni Konsehal Alvin Dizon nga nakadawat siya og report nga dunay ubang botika ang wala motuman sa mandato nga 20% nga diskuwento sa mga person with disability (PWD) sa higayon nga mamalit sila og tambal.

Matud pa sa konsehal nga kinahanglan nga motuman gyud ang mga botika sa Republic Act 9442 o gitawag nga “Magna Carta For Disabled Persons” sanglit katungod man kini sa mga PWD. Nagkanayon si Dizon nga kinahanglan nga himoan gyud dayon og aksyon kadtong mga botika nga dili motuman sa maong balaod.

Samtang usa ka PWD ang nahinabi sa Banat News kagahapon ang misaysay nga duna gyu’y ubang botika ang paugat kaayo gumikan kay dili sila tagaan og diskuwento.

Matud pa sa usa ka PWD nga si Relias Arnero, 18 anyos nga dunay higayon nga balibaran siya sa tindera sa botika nga matagaan og diskwento gumikan kay matud pa “wala ang in-charge” niini.

Duna say higayon nga kung mangayo sila og diskwento ingnon silang wala nay stock sa tambal nga iyang gipangita.

“Amoa man na nga privilege, dapat tumanon unta na nila. Dili pud baya lalim ang among kahimtang,” matud pa ni Arnero. (/EIM) (BANATNEWS)