Ginang 'sikop sa shabu

CEBU, Philippines - Wala makalusot sa kapolisan ang usa ka babayeng gituohang drug pusher human kini masikop atol sa buybust operation sa barangay Centro sa dakbayan sa Mandaue sa milabay’ng gabii.

Ang nasikop mao si Gerry Lyn Gadiana, 40, residente sa sitio Matumbo, barangay Pusok dakbayan sa Lapulapu human kini makuhai og 14 ka mga pinaketeng gidudahang shabu.

Matud pa sa hepe sa Station 3 nga si Sr. Insp. Wilson Abot dugay na nilang gipanid-an si Gadiana nga magkanunayan sa maong dapit bisan pa og kini usa ka residente sa dakbayan sa Lapulapu ug gitumbok kini nga namaligya og ginadiling drugas (shabu).

Gumikan niini ilang gipahigayon ang buybust operation sa milabay’ng gabii nga miresulta sa pagkasikop niini, nakuha usab kaniya ang marked money sa kapolisan nga gigamit sa pagpalit kaniya og shabu.

Ang ginang hugtanong mihimakak sa pasangil sa mga polis apan pasakaan gihapon kini og kasong kalapasan sa Sec. 5 Art. II ubos sa RA 9165.  - BANAT NEWS