CEBU, Philippines - Duha ka mga tawo ang napalgang patay sa managlahing takna ug dapit sa dakbayan sa Lapulapu nga gituohang gibuntog sa ilang mga balatian.
Napalgang patay mao si Remelito Gallardo, 32, construction worker nga taga Cogon, Tuburan ug temporaryong nagpuyo sa Helen Ville Subdivision sa barangay Mactan, dakbayan sa Lapulapu.
Si SPO1 Allan Pantaleon sa Homicide Section nga nahinabi sa Banat News miingon nga alas-11 pasado ang takna sa miaging gabii katapusang nakit-ang buhi si Gallardo nga nagkaon sa sulod sa lawak niini.
Apan nianang pagkabuntag wala na kini mobangon pa ug dihang gisusi sa mga kauban patay na kini sa gihigdaang folding bed, gituohang giurom kini.
Ang laing namatay mao si Jeffrey Dungog, 39, taga sitio Lucata, barangay Looc sa mao gihapong dakbayan kinsa napalgan alas- 6 pasado ang takna sa buntag kagahapon.
Usa ka Edmund Malinis maoy unang nakakaplag sa patay’ng lawas ni Dungog nga naglutaw sa mabaw nga bahin sa hunasan sa dagat sa maong dapit.
Matud pa ni PO2 Winston Ybañez nga ang asawa ni Dungog nga si Margie mitug-an nga alas-8 pasado sa miaging gabii nga milakaw ang iyang bana aron manguha og alimango ug mga kinhason sa hunasan sa barangay Canjulao.
Apan nabuntag nalang wala kini makauli. Giangkon niyang may sakit nga patol ang iyang bana. - BANAT NEWS