Ulo sa motorista nabagnos sa railing patay

CEBU, Philippines - Patay ang 27-anyos nga lalaki human malamba ang gimanehong motorsiklo sa barangay Perelos siyudad sa Carcar niadtong Domingo sa alas 5:40 sa hapon.

Ang biktima nga patay nang nadangat sa tambalanan mao si Philbert Palang, nagpuyo sa nahisgutang lugar.

Matud ni PO1 Japhet Saavedra, desk officer sa Carcar City Police dihang nahinabi sa Banat News gikan sa siyudad sa Sugbo ang biktima ug pag-abot sa maong dapit misuway kini og overtake sa gisundang sakyanan.

Apan tungod sa kakusog sa iyang dagan nawad-an kini og kontrol sa manobela ug nalamba kini nga nag-una ang ulo pagtugpa sa sementadong railings una pa mabagnos sa dalan.

Ang biktima wala magsuot og helmet nianang tungora ug daling gitabang sa mga estambay ug gihatud sa Carcar District Hospital nga wala nay panimuot apan pag-abot didto gideklarar kining patay na. (/EIM)(BANAT NEWS)