Jadewell padayong mag-operate

CEBU, Philippines - Gitubag sa tagdumala sa Jadewell Parking System Corporation ang pahibalo sa kagamhanan sa dakbayan sa Mandaue nga tinguha niining pagputol na sa ilang kontrata.

Kini ang nasayran sa Banat News kang Tomas Villanueva, operation manager sa Jadewell nga nahinabi kagahapon.

Si Villanueva miingon nga bisan sa maong pahibalo nga gipadangat sa kagamhanan sa maong dakbayan nga putlon na ang ilang kontrata sa gihapon padayon ang ilang operasyon.

Ang siyudad mipahibalong buot na nilang putlon ang serbisyo sa Jadewell tungod sa giingong mga reklamo sa mga motorista batok sa naulahi. Matud pang Villanueva sukad migawas ang balita nga putlon na sa siyudad ang ilang operasyon daghan nang abusadong mga motorista ang migara ug manuyo pa kanila.

Gani atol sa ilang pagpanakop niadtong miaging adlaw duha ka mga dump trucks nga illegal nga nag-parking sa towing area nga ilang gisitar ang miwarawara pa og kopya sa pamantalaan nga nagbalitang giputol na ang ilang serbisyo sa siyudad.

Giklaro ni Villanueva base sa kontrata sa tuig 2015 pa matapos ang ilang serbisyo sa dakbayan maong magpadayon ang ilang operasyon.

Hinuon si City Administrator James Abadia nga nahinabi sa mga tigbalita miangkong kuwang pa sa kahimanan ang siyudad sama sa tow truck aron mahimo ang mahimo sa Jadewell.

Dugang pa niya nga wala say lugar o impounding area ang siyudad sama sa Jadewell aron kabutangan sa ilang madakpang sakyanan.  - BANAT NEWS