2 bus companies gipamulta

CEBU, Philippines - Duha ka mga dagkong bus operators dinhi sa Sugbo ang gipamulta sa Land Transportation Franchising and Regulatory Board (LTFRB)-7 tungod sa kalangay nila pagduso og incident report sa ilang mga sakyanan nga nakasugat og aksidente sa kadalanan.

Si LTFRB-7 director Ahmed Cuizon mipahamtang og tag P3 mil nga multa batok sa Ceres Bus Liner ug Librando Bus tungod sa kapakyas pag-submit og accident report sulod sa 72- oras (tulo ka adlaw) human makasugat og aksidente ang ilang sakyanan.

Subay sa rekord sa LTFRB-7 nga nahipos sa Banat Manobela nagpakita nga ang duha ka bus company nakaduso sa ilang accident report niadto lang Lunes sa managlahi nga oras.

Ang usa sa sakyanan sa Librando Bus nalimbuwad sa lungsod sa Minglanilla niadtong Miyerkules (Pebrero 7) sa milabay’ng semana samtang paingon dinhi sa dakbayan sa Sugbo nga miangol sa 13 ka mga pasahero apil na ang konduktor.

Samtang ang usa sa mga sakyanan sa Ceres bus nakaligis patay usab kini niadtong petsa kwatro ning buwana.

Apan niadto lang Lunes ang maong duha ka bus company nakaduso sa ilang accident report.

Base sa memorandum nga nadawat sa LTFRB-7 gikan sa ulohan niining buhatan gihatagan og 72-oras lang ang gihatag nga tagal ngadto sa mga operators og pasaheroan pagduso og accident report kung dunay makasugat og aksidente sa ilang mga sakyanan.

Kadtong makalapas niini adunay multa nga nagpaabot kanila isip pagdisiplina.

Gihulagway kini sa direktor nga maghatag og lig-ong mensahe sa mga bus companies ug operators ang maong multa aron tumanon nila ang mga lagda. Tumong sa pagpangayo sa LTFRB og accident reports mao nga aron makapahigayon sila og kaugalingong imbestigasyon.

Hinuon sa accident report nga giduso sa Librando Bus Company sa LTFRB-7 gipahibawo nilang ilaha nang gisuspenso sulod sa napulo ka adlaw ang ilang drayber sa nalimbuwad nga sakyanan samtang nagpadayon pa ang ilang kaugalingong imbestigasyon sa hitabo.

Tipik ug kabahin kini sa mga lakang pagdisiplina sa mga bus operator ingon man sa mga drayber niini aron mamintinar ang siguridad sa mga pasahero sa adlaw adlaw nilang pagbeyahi sa lain laing lugar dinhi sa Sugbo ug tibuok Central Visayas.  - BANAT NEWS