Paid Ad sa BOPK di kalapasan-Comelec

CEBU, Philippines - Giklaro sa Commission on Elections (Comelec) nga way nahimong kalapasan ang Bando Osmeña Pundok Kauswagan (BOPK) sa gipagawas niining paid advertisement sa tulo ka mga lokal nga mantalaan nga nag-promote sa ilang mga posibling kandidato unya sa 2013 election.

May labot kini sa ‘Buy One Take One’ nga whole page ads sa tulo ka mantalaan sa Sugbo nga gihulagway nga daw nag-promote sa posibleng panagpares nila ni Kongresista Tomas Osmeña ug Bise Mayor Joy Augustus Young pagkamayor ug bise mayor sunod tuig.

Apan matud ni north district election officer Marchel Sarno dihang nahinabi sa Banat News makonsiderar lang nga kalapasan ang usa ka susamang advertisement sa si bisan kinsang politiko kung kini naka-file na og certificate of candidacy.

Ang filling sa COC matud ni Sarno unya pa magsugod sa petsa 1 sa bulan sa Oktubre karung tuiga hangtud sa petsa 5, hangtud nga di madeklarar sa Comelec kun kanus-a ang petsa sa kampanya dili mahimong makapangampanya ang mga kandidatong naka-file og certificate of candidacies.

Matud pang Sarno makapatuyang pa ang si bisan kinsang politiko pagpaila sa ilang kaugalingon sa bisan unsang legal nga paagi karong mga panahona tungod kay dili pa sila kandidato.

Ang kampo ni Mayor Michael Rama ilabina si konsehal Joey Daluz mihulagway nga early electioneering ang gihimo sa BOPK.

Si Daluz nga sakop usab sa BOPK bag-ohay lang nibali sa kampo ni Rama dungan ang pagpublikar ni kanhi kongresista Tony Cuenco sa pagpakig-alyansa niini sa kampo sa mayor nga gisundan usab sa pagpahibawo ni konsehal Labella nga sakop sa BOPK nga midawat nga mamahimong runningmate ni Rama.  - BANAT NEWS