CEBU, Philippines - Mag-atubang og imbestigasyon ang unom ka mga pulis sa Cebu City Police Office (CCPO) nga nadestino sa detention cell human sila wala makabantay sa suway pagsunog ug paggabas sa puthaw nga rehas sulod sa pansayan sa maong bilanggoan sa usa ka piniriso niadtong kaadlawon sa Domingo.
Ang unom ka mga pulis nga gipaubos sa imbestigasyon mao sila si SPO1 George Somodio; SPO2 Isagani Ceniza; PO3 Miguelito Cañete; PO2 Tomeo Tamosa; SPO1 Terrefiel ug SPO2 Celestino Alvarez.
Si Supt. Carmelo Dayon, hepe sa Cebu City Public Safety Company (CCPSB) sa CCPO nga nahinabi sa mga tigbalita nagkanayon nga alas 2:30 sa kaadlawon niadtong Domingo miulbo ang gamay’ng sunog sa karsel sa mga lalaki.
Una nilang gidudahan nga faulty electrical wiring ang hinungdan apan sa gihimong pakisusi sa Bureau of Fire Protection (BFP) nga miresponde sa maong alarma nasuta nga dili linya sa kuryente ang hinungdan kundili sigarilyo.
Tungod niini gidudahang dunay suway nga pagsunog sa detention cell hinungdan nga giinspeksyon kini, nasuta nga gigabas na diay ang puthaw sa kisame ibabaw sa pansayan gawas sa pagsuway og sunog.
Alas-9 sa gabii niadtong Domingo, mipahigayon og greyhound operation ug nasuta nga si Clemente Jever Jr., 22, taga dalan Gorordo Avenue sa barangay Camputhaw maoy responsable sa paggabas sa puthaw ug pagsuway ug sunog.
Giingong gituyo og sanday ang upos sa sigarilyo sa linya sa kuryente sulod sa pansayan maoy sinugdanan sa sunog nga daling nabantayan sa ubang mga piniriso nga daling mibubo og tubig.
Nagtuo ang kapolisan nga kung nakadako pa ang kalayo ilaha gyung pagawson ang mga priso ug posibleng diha ang aktwal nga planong pag-ikyas buhaton.
Si Jever nga nahinabi sa Banat News mihimakak nga iyang gituyo ang pagsunog sanglit ang sigarilyo nga iyang gilabay didto mopunta sa mga basura nga papel, apan iyang giangkon nga siya maoy migabas sa puthaw. (/EIM) (BANATNEWS)