'Suspek' sa pagpatay sa canvasser nadakpan

CEBU, Philippines - Gipasanginlang usa sa suspetsado sa pagpusil patay sa canvasser og tambal sa miaging semana diha sa ganghaan sa Vicente Sotto Memorial Medical Center (VSMMC) ang gidakop kagahapon pasado alas-10 sa buntag sa sitio Sto. Niño sa barangay Sambag 2 ning dakbayan sa Sugbu.

Apan ang suspek nga si Albert Senining,28,hugtanong mihimakak sa pasangil nga siya maoy usa sa suspetsado sa pagpusil patay kang Louie Padayao, 26, alyas ‘Lupin’ nga canvasser og tambal sa usa ka botika atbang sa VSMMC niadtong Miyerkules sa buntag.

Gawas kang Padayao laing duha ka mga tawo ang naamong sa maong pagpamusil samtang giimbestigahan usab ang duha ka gwardiya sa VSMMC tungod kay walay nahimo sa pagkahitabo.

Si Senining matud pa sa kapolisan nabilanggo na niadtong tuig 2006 ug hapit usa ka tuig pa kini gikan nakagawas sa Manila City Jail sa kasong pagpangawat. Nabilanggo na usab kini niadtong 2003 ug 1997.

Ang mga sakop sa Investigation and Detective Management Branch (IDMB) sa Cebu City Police Office (CCPO) pinangulohan ni Chief Insp. Bonifacio Garciano maoy nakadakop kaniya.

Si Rosalie Bael Viajante, 23, kapuyo ni anhing ‘Lupin’ nga miadto sa IDMB mitug-an nga sa wala pa pusila ang iyang kapuyo pirme nilang makit-an si Senining sa VSMMC.

Apan si Garciano mitug-an nga human gipatay si ‘Lupin’ milutaw dayon ang pangalan ni Senining nga siya maoy usa sa mga suspek, positibo usab kining gitumbok sa duha ka mga saksi kinsa gipaabot pa nilang mokooperar sa imbestigasyon.

Klaruhon pa sa mga imbestigador kung unsay papel ni Senining sa maong krimen. Gawas kang Senining laing lalaki usab ang giimbitahan sa IDMB kalabot gihapon sa maong kaso.  (BANATNEWS)