Gibunala'g tubo sa ulo patay

CEBU, Philippines -  Patay ang usa ka lalaki nga gituohang gibunalan og tubo sa ulo diha sa sitio Calderohan sa barangay Maguikay, dakbayan sa Mandaue alas-10 pasado ang takna sa miaging gabii, usa sa mga suspetsado ang nadakpan sa kapolisan.

Ang namatay mao si Greggy Ople, 29,taga barangay Cabancalan sa maong dakbayan ug ang nadakpan mao si Romeo Villaflor, 46, nagpuyo sa maong dapit.

Si SPO4 Fernando Gabutero sa kapolisan sa Presinto 4 sa Mandaue City Police Office (MCPO) nga nahinabi sa Banat News miingon nga usa sa mga kauban sa biktima nga nakadagan maoy miila ni Villaflor nga usa sa grupong nagtabang og bunal kanila.

Ang biktima ug si Joel Maghuyop gikan pa nag-inom sa usa ka tindahan ug padulong nang mamauli dihang nahitabo ang pagpangatake. Si Maghuyop daling nakadagan ug midiretso sa Casuntingan Police Station ug nangayo og tabang.

 Apan pag-abot sa mga polis sa lugar wala na diha ang mga lalaking nagtinabangay og bunal kanila apan usa kanila gitumbok ni Maghuyop nga mao si Villaflor hinungdan nga kini gisikop diha sa ilang balay.

Si Ople nga niadtong tungora nabuyong pa tungod sa bun-og sa ulo gidala sa Mandaue City Hospital apan gitambagan nga magpa-scan apan tungod kay wala kini kwarta mipauli na lang kini apan didto kalit kini nalup-og ug namatay. Gawas kang Maghuyop laing saksi usab ang mitumbok kang Villaflor nga usa sa grupong mibunal-bunal sa biktima. (BANATNEWS)