Estudyante sa Talisay nangitag summer job

CEBU, Philippines - Ang mga kabus nga estudyante sa dakbayan sa Talisay nagpangita og trabaho sama sa summer job   nga itanyag  sa kagamhanan karong   bakasyon nila sa klase.

Si Talisay City Administrator Richel Bacaltos nga nahinabi sa Banat News kagahapon mibutyag nga ubay-ubay na ang mga estudyante nga nagpangutana sa iyang buhatan kun may summer job ba karong tuiga. Apan matud pa niya nga ipasusi pa niya kun may budget ba ang kagamhanan alang sa summer job ug unya na kini masayri sa katapusang semana ning buwana.

Ang kataposang summer job sa mga estudyante sa maong dakbayan niadto pang tuig 2010.

Matud ni Bacaltos nga ang nahisgutang programa proyekto sa Department of Labor and Employment (DOLE) kinsa migahin og 60 porsiyento sa suholan sa mga trabahante, ug ang 40 porsiyento niini gipas-an sa kagamhanan sa Talisay.

Matag bata nagdawat og P250 nga suhol matag adlaw sulod sa usa ka buwan sa maong summer job.

Apan kadtong labing kabus gitugotan nga makatrabaho sulod sa duha ka buwan nga nagsugod sa buwan sa Abril ug natapos sa buwan sa Mayo.

Kun may summer job karong tuiga, ang ipatrabaho kanila mao ang paghinlo sa sapa sa Mananga, may idestino sa Public Market, may mag- survey sa mga residente sa pagsuta sa ilang mga problema aron matun-an sa dakbayan ang solusyon niini.  - BANAT NEWS