Habeas corpus nga petisyon gibasura sa korte

CEBU, Philippines - Gibasura sa hukmanan ang giduso nga habeas corpus nga petisyon sa nangangkong paryente sa 9-anyos nga batang babaye nga nasalbar sa mga otoridad gikan sa usa ka Swedish National nga si Conny Longstreom.

Si Regional Trial Court (RTC) Branch 24 Olegario Sarmiento misalindot sa petisyon nila ni Jesus Mitra ug Mary Jane Mitra-Evangelista tungod sa kakuwang nila og ebidensya nga paryente sila sa bata. Apan gihatagan sila ni Sarmiento   og higayon nga maestorya ug mahimamat ang biktima nga anaa karon sa buhatan sa kagamhanan.

Kini tungod kay ang Co-chairman sa Provincial Women’s Commission (PWC) Vice-Governor Agnes Magpale mibutyag nga ang kustodiya sa bata ila nang gitugyan sa Department of Social Welfare and Development (DSWD). Si Provincial Attorney Marino Martinquilla, ang abogado sa mga respondente mibutyag nga makigbisog sila alang sa kaayohan sa bata uban sa pagsuta kun hangtod kanus-a puwedeng maduaw ang bata.

Samtang ang abogado sa DSWD nga si Raymund Bertulfo mibutyag usab nga ang mga nahisgutang petitioner walay katungod sa pagkustodiya sa bata tungod kay kulang sila sa mga papeles pagpamatuod nga paryente sila sa biktima.

Kahinumdoman nga ang bata na-rescue sa mga sakop sa National Bureau of Investigation niadtong Pebrero 20 sa pantalan sa dakbayan sa Sugbo uban ni Longstreom samtang nagpaabot og barko paingon sa Masbate.  - BANAT NEWS