Pusher sa shabu sikop

CEBU, Philippines - Usa ka giingong pusher ang nasikop na usab sa kapolisan sulod sa usa ka construction site nga iyang gitrabahoan sa dakbayan sa Talisay sa miaging adlaw.

Ang nasikop mao si Marley Badajos, 24, molupyo sa sitio Salvador, barangay Tanke sa nahisgutang siyudad.

Ang nakasikop sa suspetsado mao sila si Inspector Hugo Rio Ipong, SPO1 Frederick Larrobis, PO3 Arnold Damasco, PO3 Roy Lofranco ug PO1 Euwen Pitogo.

Dala sa maong mga polis ang warrant of arrest sa kasong kalapasan sa Section 11 sa Akta Republika 9165 kon “Dangerous Drugs Act Law” batok kang Badajos nga giluwatan ni Regional Trial Court (RTC) Judge Meindrado Peredes sa Branch 13.

Si Badajos gitugotang makapiyansa og P200,000 alang sa iyang temporaryong kagawasan.

Si Lofranco ug Pitogo nga nahinabi sa Banat News mibutyag nga kaduha na nila masikop kaniadto si Badajos sa mao gihapong kalapasan.

Matud sa duha nga sa milabay’ng tuig   si Badajos ug ang kauban niini nagsakay og motorsiklo nga wala maghelmet, ug wala usay plate number ang ilang gisakyan.

Dihang ila kining giduol mipasutoy og padagan sa ilang sakyanan ug samtang nagdagan gilabay niini sa daplin sa karsada ang usa ka gamay’ng putos.

Gipunit sa mga polis nga naggukod kang Badajos  ang maong putos ug nasuta nila nga shabu ang sulod niini.

Si Lofranco midugang nga sa maong insidente napasakaan nila og kasong paghupot og ginadiling drugas ngadto sa korte si Badajos hangtud nga nalutsan kini og warrant of arrest.  - BANAT NEWS