6 ka brgy. sa Minglanilla hatagan og multicab

CEBU, Philippines - Unom ka mga multicab ang ihatag ni Gobernador Gwendolyn Garcia alang sa mga barangay sa lungsod sa Minglanilla alang sa mga emerhensyang hitabo ug mga kalihokan sa barangay.

Nasuta sa gobernador ang kamahinungdanon sa maong mga sakyanan ilabi na sa panahon nga may mga dagkong hitabo nga nagkinahanglan og sakyanan sama sa nahitabo sa lungsod sa Tuburan nga gihugpaan sa tipos. Ang mga barangay nga makadawat og multicab mao ang barangay Vito, Guindaruhan, Campo 8, Cuanos, Tongkil ug alang sa Association of Barangay Captains (ABC) sa lungsod sa Minglanilla.

Ang maong kalamboan gikalipay pag-ayo sa mga opisyal sa lungsod sa Minglanilla nga mipadangat sa ilang kinasingkasing nga pasalamat sa gobernador, usa niini si Councilor Concordio Mejias.

Si Mejias miingon nga sukad pa kaniadto walay puas nga mitabang ang governor sa ilang lungsod.

Alang sa Kabanhawan Festival ning tuiga ang gobernador mohatag usab og laing P300 mil nga financial assistance sa kagamhanan sa maong lungsod.

Kining tanan alang sa paghatag og dugang kalamposan sa maong kalihokan sa lungsod.  - BANAT NEWS