Padayong nanawat og donasyon - Vidal

CEBU, Philippines - Usa ka plenary meeting ang ipatawag ni Cebu Archbishop Emeritus Ricardo J. Cardinal Vidal sa tanang committee ug chairmen alang sa pagplantsa sa detalye sa nagsingabot nga makasaysayanong canonization ni Blessed Pedro Calungsod sa Oktubre 21 didto sa Vatican City.

Ang maong tigom nga tambungan sa tanang sakop sa Council for the Preparation for the Canonization of Pedro Calungsod ipahigayon sa Marso 14 sa pinuy-anan ni Vidal sa Sto.Niño Village sa Brgy. Banilad, ning syudad.

Usa sa hisgutan sa maong tigom mao ang padayon nilang pagpanawat og donasyon nga maoy gamiton sa paglarga sa mga kadagkoan sa simbahan ngadto sa Roma.

Sa mao gihapong mga donasyon kuhaon ang pundo alang sa mga lokal nga kalihukan dinhi sa nasud kalabot sa maong selebrasyon ilabi na sa himuong dakung Santos nga Misa diha sa South Road Properties (SRP).

Nasayran nga gibana-banang moabot sa P50 milyones ang gikinahanglang salapi alang sa pagselebrar unya sa pagka-Santos ni Calungsod.

Sa laing bahin si Cebu Archdiocese Episcopal Vicar Msgr. Esteban Binghay namahayag nga naghinam-hinam na ang simbahan sa pag-abot sa opisyal nga pagkahimong santos ni Calungsod.

“Mismo ako mokuyog og larga didto, nagpaabot gyud ang tanan sa maong historic event diin usa ka bisaya ang mahimong ikaduhang santos gikan sa Pilipinas,” matud pa niya.

Gipahibalo usab sa simbahan ang mga aktibidades sa ika-13 nga Annual Feast ni Blessed Pedro Calungsod nga magsugod sa Marso 22 ngadto sa 31.

Lakip sa kalihukan sa Marso 31 mao ang usa ka dawn procession nga manukad diha sa Cebu Metropolitan Cathedral ug matapos didto sa Archdiocesan Shrine of Blessed Pedro Calungsod.   - BANAT NEWS