Naghikog tupad sa asawa

CEBU, Philippines - Naputol ang panaglalis sa magtiayon human giingong kalit nga nagpusil sa iyang kaugalingon ang usa ka bana pasado alas-6 sa miaging gabii sa barangay Perrelos syudad sa Carcar.

Ang nagpusil nailhan nga si Raymund Encabo, 23, molupyo sa maong lugar kinsa gikatahong nagpusil sa iyang liog nga maoy hinungdan sa iyang kamatyon.

Sa pakighinabi sa Banat News ni PO3 Rosendo Binondo sa Carcar Police Station kinsa usa sa mga nag-imbestigar sa maong kaso mibutyag kini nga base sa ilang nakuha nga impormasyon gikan sa asawa sa naghikog nga si Cherry Mae naglalis silang duha sa wala pa ang hitabo.

Matud pa sa mga polis nagpunay og yawit ang bana ngadto sa asawa tungod kay giingong na-short kini og P200 sa trabahoan apan wala kini tubayi sa asawa hangtud nga sila namahuway na.Apan bisan sa ilang paghigda giingong padayon gihapon sa pagyawit ang bana ug daw nahiubos nga wala siya tingugi sa asawa ug kalit lang miingon “unsa man maghikog ko?”

Bisan paman sa maong pangutana sa bana matud pang Binondo wala gihapon manumbaling ang asawa hangtud nga nakadungog nalang kini og usa ka buto sa armas.

Sa paglingi sa asawa nagkadugo na ug nagkupot pa sa usa ka kalibre .38 rebolber ang bana niini nga giingong maoy gigamit sa pagpusil.

Daling gitabang sa asawa ang bana ug gidala sa Carcar City District Hospital apan nakabsan gihapon kini sa iyang kinabuhi.

Matud pa ni Binondo nga ilang gipalawman ang imbestigasyon kalabot sa maong insidente ug gani, ilang gilakip sa pag-imbestigar ang asawa tungod kay sila lang duha ang diha atol sa insidente.

Dugang pa ni Binondo nga ilang gipaubos sa paraffin test ang mga kamot sa bana aron masayran kun may gunpowder residue sa mga kamot niini nga usa sa timailhang nakapabuto kini og armas.

Wala nalang nila iapil sa pag-paraffin test ang asawa tungod kay mabdos kini.  - BANAT NEWS