Kapin 20 na ka bangga ang nahitabo sa Tabunok

CEBU, Philippines - Tungod sa pagpaturagas og padagan sa pipila ka mga motorista kapin sa 20 na ka mga aksidente ang natala diha sa national road habig sa sitio Mananga, barangay Tabunok paingon ngadto sa barangay Linao, dakbayan sa Talisay.

Aron dili na madungagan pa ang maong mga aksidente gisugyot ang pagbutang na og lane separator tungatunga sa maong dalan.

Si Gerard Lariego, hepe sa traffic monitoring sa siyudad nagkanayon nga sobra sa 20 ka aksidente sa sakyanan ang nahitabo diha sa maong lugar sa milabay’ng tuig wala pay labot sa mga nahitabo ning tuiga.

Gani dunay mga kinabuhi ang nakalas hinungdan nga ang siyudad nagplano og pagbutang na og lane separator diha sa maong karsada.

Matud ni Lariego nga sa ilang naobserbahan kasagaran sa mga bus nga moagi diha sa nahisgutang karsada magpasutoy og padagan ug mokawat og lugar sa pikas nga habig sa karsada nga maoy kasagarang hinungdan sa disgrasya.

Gawas niini ang mga sidewalk diha habig sa Saint Joseph Parish sa Tabunok paingon ngadto sa Mang Tinapay Bakery nga nahimutang ubos sa flyover ang butangan og mga railings aron ang mga tawo dili na anha sa karsada mosubay nga duol sa disgrasya.

Matud usab ni Lariego nga naalarma usab sila sa mga nahitabong disgrasya diha sa sitio Salvador, barangay Tanke dapit sa fishport diin ang ilang nakitang hinungdan tungod sa kadaku og buka sa center island niini diha sa maong dapit.

Iyang gipasabot nga mubo lang ang center island diha sa lugar hinungdan nga daku og buka ang karsada ug ang mga sakyanan mosayon-sayon lang sa pagliko nga kasagarang hinungdan sa bangga.

Ang maong sitwasyon susihon nila kini ngadto sa Department of Public Works and Highways (DPWH) aron masolusyonan ang maong problema. Kahinumduman diha dapit sa fishport niining bag-o lang ang service vehicle ni Bokal Peter Calderon ang gidaro sa usa ka dump truck nga kalit miliko ug maayo gani walay nangaangol sa maong aksidente. (BANATNEWS)