Sa mahal nga petrolyo ug sa planong usbaw sa pletihan

CEBU, Philippines -  Mitiyabaw na usab ang mga drayber ug operators sa taksi nunot sa padayong pagsaka sa presyo sa lana hinungdan nga nimenus usab ang ilang abot matag adlaw nga ilang madala sa ilang mga pamilya.

Mitiyabaw tungod sa kamahal sa petrolyo, apan mitiyabaw gihapon ang uban tungod sa posibilidad nga maalkanse sila sa ilang kitaon tungod sa kabalakang momenus ang manakay tungod sa kamahal na unya sa flag down rate.

Dako usab ang ilang pagdudang ang mga operators mao ray mabulahan sa gipangayong dugang usbaw karong panahona pinaagi sa pagpasaka sa ilang abangan sa taxi unit. Sagad sa mga drayber nga napangutana sa Banat Manobela miingon nga nabalaka gihapon sila sa planong patas-an ang pletihan sa taksi.

Niadtong milabay’ng semana nagsunod-sunod ang pagsaka sa presyo sa lana sa world market hinungdan nga ang mga local oil players mipasaka usab sa ilang mga presyo. Gawas sa krudo ug gasolina, lakip sa misaka ang presyo mao ang mga produktong ginama gikan sa petrolyo ingon man ang mga liquefied petroleum gas (LPG) nga mao karoy sagad gigamit sa taksi. Apan ang mga drayber sa taksi kun silay pabut-on buot nilang i- roll back ang presyo sa lana ug i-roll back usab ang abangan nila sa ilang mga unit. Ang abangan sa matag taksi karon P800 pataas alang sa 12-oras nga pamasahero.

Depende usab kini sa sistemang gipatuman sa operator tungod kay dunay uban nga inadlaw ang pagpaningil nila sa abangan ug duna say 8-oras ra tungod kay adunay laing mga drayber nga moabang.

Kinahanglan usab nga natubilan nila og gasolina o LPG ang tangke sa ilang paggarahe sa unit aron makadagan dayon ang sunod nga drayber nga moabang. Apan ang mga taxi operators aduna man puy kaugalingong interes ug rason maong miyangungo sila og umento.

Matud pa ang ilang pag-operate sa mga taksi nagtangag og mga expenses sa maintenance, karong panahona giingong misaka ang presyo sa mga piyesa.

Ang mga drayber sa taksi miingon nga dili angayang ang mga pasahero maoy hasolon o moabaga sa pagtaas sa presyo sa lana pinaagi sa mas taas nga pletihan tungod kay momenus usab ang manakay og taksi.

Kini nagpasabot nga dili mopatak ang ilang metro apan kaunon ang ilang gasolina ug LPG sa pagtuyoktuyok a kadalanan, kung pila may kitaon kuhaan pa nila sa ilang abangan ug itubil.

Ang flagdown sa taksi karon P40.00 ug P3.50 ang patak matag kilometro apan ning bag-o lang usa ka grupo sa transportasyon ang miduso og petisyon nga patas-an kini.

Si Richard Cabucos, presidente sa Metro Cebu Taxi Operators Association (MCTOA) nagkanayon nga giduso na nila ang ilang petisyon niadtong Miyerkules (Marso 7) sa buntag alang sa P10 nga usbaw sa flag down rate sa taksi ug dugang nga piso nga patak matag kilometro.

Kung kini maaprobahan gikan sa P40 mahimo na unyang P50 ang flagdown rate ug gikan sa P3.50 nga patak matag kilometro mahimo na kining P4.50. Miangkon hinuon si Cabucos nga dunay mga drayber sa taksi ang wala makauyon niini apan matud pa niya kasagaran sa iyang gipangpangutanang drayber nakauyon sila nga patas-an ang pletihan.

Kadtong mga sumasakay nga nagdaginot apan kaniadto makasakay-sakay pa og taksi hayan makat-on na unyang mosakay sa mga jeepney ug mga bus. (/EIM) (BANATNEWS)