CEBU, Philippines - Minyo nga lalaki gidakop sa kapolisan human pasanginling midagit ug mibilanggo sa 22-anyos nga dalagang kanhi niya uyab nga gusto nang makigbuwag kaniya diha sa sitio Tunga sa barangay Cantuod lungsod sa Balamban.
Apan ang pagpanagit didto mahitabo sa barangay Uwak sakop na sa lungsod sa Asturias sa alas-9 Biyernes sa gabii.
Ang biktima (pangalan gipugngan) nagpuyo sa barangay Nangka lungsod sa Balamban giingong gitanggong sulod sa lawak sa balay sa suspek sulod sa usa ka gabii.
Ang gidakop mao si Jason Romero Dandan, 29, minyo apan gibuwagan na sa asawa ug kanhi uyab sa biktima kaniadto kinsa nagpuyo na sa sitio Tunga sa barangay Cantuod, Balamban.
Matud ni PO2 Manuel Gilamon, desk officer sa Asturias Police Station dihang nahinabi sa Banat News subay sa inisyal nga imbestigasyon ang biktima kauban sa mga barkada nga nag- jogging niadtong higayuna ug way kalibutan nga gisundan sa suspek nga iya kanhi hinigugma.
Pag-abot sa maong lugar kalit lang gipadul-an sa suspek ang biktima ug gitionan og armas ug pugsanong gidala sa iyang pinuy-anan ug didto gitanggong sa lawak.
Ang mga kauban sa biktima mao nay nisumbong sa iyang mga ginikanan sa hitabo hinungdan nga ang amahan niini midangop sa kapulisan.
Pagka alas 7:50 sa buntag nakit-an ang suspek sa ilang pinuy-anan hinungdan nga gisukitsukit kini sa kapolisan uban sa ginikanan sa biktima ug dangtan pipila ka minutos mitug-an kining iyang gitagoan sulod sa iyang lawak ang biktima.
Ang mga awtoridad ug ginikanan sa biktima diretsong misaka sa kwarto ug didto ilang naabtan ang naghilak nga biktima. Ang suspek gidala sa buhatan sa kapulisan ug gibalhug human ang ginikanan sa biktima desidido gyud nga mopasaka og kasong abduction ingon man illegal detention batok niya ugmang adlawa.
Dugang nahipos nga impormasyon sa kapulisan nga ang suspek human magkabuwag sa asawa nagkauyab sila sa biktima apan gibuwagan sa dalaga apan di kadawat ang suspek. (BANATNEWS)