CEBU, Philippines - Tun-an sa kagamhanang lokal sa dakbayan sa Lapulapu ang color coding system sa mga sakyanang pangpubliko nga magbiyahe sa dakbayan sa Lapulapu ilabi na gikan sa lungsod sa Cordova.
Matud pa ni Mayor Paz Radaza iyang gitugyan sa mga sakop sa City Traffic Management System ug Traffic Division sa kapolisan sa dakbayan ang pag-monitor sa usa sa sugyot nga himuong color coding ang mga sakyanan sa Cordova aron maminusan ang gidaghanon sa sakyanan nga moagi sa Poblacion dakbayan sa Lapulapu ug sa merkado publiko sa maong dakbayan.
Base sa maong sugyot mas maayong color coding sama sa gihimo sa mga tricycle matag adlaw.
Gumikan niini posibleng mopatawag siya og tigom sa mga drayber ug sa mga sakop sa Sanguniang Panglungsod aron ipasabot ang maong lakang.
Ang matag PUJ adunay ibutang nga colored sticker nga ipapilit aron maila kung kinsa ang mobiyahe matag adlaw diin mapalit sa ubos lamang nga presyo sa mga operators ug drivers.
Kahinumduman nga mireklamo ang mga drayber ug operators nga nagbiyahe sa lungsod sa Cordova human giusab ang ilang rota ubos sa obserbasyon sa CTMS aron sa pagminus sa gibug-aton sa dagan sa trapiko sa merkado publiko sa dakbayan sa Lapulapu ug sa Poblacion gumikan sa reklamo sa mga motorista sa maong dakbayan. (BANATNEWS)