Ang kalig-on sa panaghiusa nasuta

CEBU, Philippines - Sa makausa pa, nakita ug natagamtaman sa mga taga Toledo ang panaghiusa sa kagamhanan sa lalawigan, dakbayan sa Toledo ug sa buhatan ni 3rd District Congressman Pablo John Garcia. Ang maong talagsaong panaghiusa nasinati sa mga taga Toledo atol sa gipahigayon nga "Duaw Alagad sa Barangay" didto sa Bato, dakbayan sa Toledo diin gidalit ang nagkalainlaing libre nga serbisyo ang napahimuslan sa liboan nga mga taga barangay Bato ug silingang mga lugar.

Naglakip sa maong serbisyo ang libreng konsultasyon sa panglawas, pagpang-apud-apod og tambal, ug uban pa.

 Sila si Toledo City Mayor Aurelio Espinosa, Vice Mayor Arlene Zambo ug Bato Barangay Captain Leonilo Pama miila sa maong panaghiusa ug kinasingkasing nga nagpasalamat sa abag nila ni Governor Gwendolyn ug Congressman PJ sa kalamposan sa maong kalihokan.

Matud pa ni Mayor Espinosa nga natagamtaman na nila ang maanindot nga bunga sa panaghiusa sa mga local leaders busa wala’y katarungan nga mangita pa sila og lain.

Sila si 3rd District Board Member Alex Binghay ug Caesar Ian Zambo mihangop sa maong panaghiusa dungan sa panghinaot nga magdala kini og dugang kalamboan alang sa mga Toledohanon.

Samtang si 3rd District Congressman Pablo John “PJ” Garcia sa iyang bahin subli nga mipalanog sa ilang walay puas nga pagsuporta ni Governor Gwendolyn sa mga taga barangay Bato ug sa uban pang mga Toledohanon.

Ang gobernador sa iyang bahin mitataw mas nga daghan pa ang makitang kaayohan sa katawhan kun ang mga lokal nga namunoan sa pangagamhanan sa probinsiya, uban sa kongresista sa tresiro distrito ug siyudad sa Toledo kanunay nga magkaduyog alang sa kalamboan sa katawhan.

Nunot niini ang gobernadora mihagit sa mga tawo nga dili na tugotan pa ang laing kampo nga moguba sa maayong relasyon sa mga miyembro sa One Cebu Party. Kini tungod kay panagsungi ug kagubot lamang ang masinati sa katawhan ug walay mga maayong programa ug mga proyekto ang matagamtaman ug mapahimuslan sa mga Sugboanon kun mahitabo kini.

Dugang sa paghagit nga magpabilin sa nagkalig-on nga One Cebu Party, ang gobernador mihangyo sa katawhan nga angay nilang ilubong sa kalimot kadtong mga tawo nga buot mogusbat sa maayong relasyon sa probinsiya ug mga local government unit aron magpadayon nga malambuon ang lalawigan sa Sugbo. (BANATNEWS)