Tipos mihugpa usab sa Alegria

CEBU, Philippines - Human sa paghugpa sa tipos sa lungsod sa Tuburan, niining ulahi mihugpa na usab ang tipos sa barangay Legazpi, lungsod sa Alegria.

Base sa report sa TV Patrol Central Visayas nga ang Rural Health Unit sa Alegria mibutyag nga niadto pang Pebrero 27, 2012 nagsugod ang kaso sa tipos sa ilang lungsod.

Sukad sa maong petsa mikabat na sa 18 ka tawong masakiton ang na-admit sa Reinhard Wirtgen Memorial Hospital apan 13 lang niini ang kompirmadong adunay tipos.

Giingong kasagaran sa gitipos taga barangay Legazpi sa nahisgutang lungsod.

Laing upat usab ang na-admit didto sa Malabuyoc District Hospital.

Apan sukad kagahapon walo na lang sa 13 ang nagpabiling may tipos sa Reinhard Wirtgen ug usa na lang sa upat nga na-admit sa Malabuyoc District Hospital.

Niadtong Disyembre 2010 ang kagamhanan sa probinsya sa Sugbo mipagawas og pundo alang sa lungsod sa Alegria dihang mihugpa usab ang tipos sa maong lungsod hinungdan nga gipaubos kini   sa state of calamity.

Ang kwarta nga gihatag sa probinsiya gigamit sa pagpamalit og 10 ka chlorinator apan walo ra niini ang nagamit tungod kay ang duha gubaon na.

Ang RHU sa lungsod sa Alegria nagkanayon nga sugdan na nila ang water sampling sa barangay Legazpi.

Giingong sagad sa mga panimalay sa maong barangay walay mga pansayan ug gituohang maoy sinugdanan sa paghugpa sa maong sakit. (BANATNEWS)