Nangilkil pinaagi sa internet sikop

CEBU, Philippines - Nahulog sa mga kamot sa National Bureau of Investigation ang usa ka lalaking gipasanginlang nangwarta sa usa ka menor de edad nga Filipino-Japanese model gamit ang nakuha niining mga hubong hulagway sa biktima.

Ang mga sakop sa NBI-7 midakop kang John Jayson De Jesus Antonio, 25, molupyo sa V. Rama barangay Guadalupe human sa gipahigayong entrapment operation niadtong Lunes sa gabii.

Nasayran nga usa ka 16-anyos nga biktima ang midangop sa buhatan sa NBI ug mireklamong gikilkilan siya sa suspek kinsa mihulgang ipakatap sa internet ang mga hubo niyang hulagway.

Nasuta usab sa imbestigasyon sa NBI ang suspek migamit og tulo ka mga alyas sa pag-ilad sa biktima aron kini pangwartahan.

Nagsugod ang pagpangilkil niadtong Oktubre ug niadto lang Lunes sa gabii madakpi ang suspek.

Base sa affidavit sa biktima nga nakighigala siya sa usa ka lalaki nga ginganlan og Direck nga iyang gikaila sa usa ka mall sa dakbayan sa Sugbu ug iyang gihulagway nga 'nice and kind’ ug kanunay na niya kining ka-text.

 Diha usab sa iyang facebook account usa ka Hayumi Zayura usab ang iyang nakaila kinsa giingong midayeg sa iyang dagway isip usa ka modelo ug mitanyag usab kaniya og protein powder nga giingong makapanindot pa sa iyang lawas.

Bisan paman og wala niya personal makaila si Zayura misalig siya paghatag og iyang mga hulagway, pipila niini hubo gyud ang iyang pang-ibabaw ang litrato kay aron daw mabasehan kung dunay kausaban unya nga ibunga sa ihatag niyang protein powder.

Apan sa kalit lang, gipahibalo siya ni Zayura nga nawala ang iyang ipod diin niya gihipos ang mga hulagway sa biktima ug ang nakapunit midemandang magpabayad kini.

Tungod sa kabalakang ipakatap sa internet ang iyang hulagway gi-text sa biktima ang numero sa nakapunit nga gihatag ni Zayura apan ang nagpaila Jhenrick De Jesus mitubag nga magpabayad kini og P10 mil ug P5 mil kung makig-‘romance’ ang biktima hangtud nga gihimo kining DSLR ug naus-os pa ngadto sa P15 mil.

Gumikan kay wala kini kwarta naproblema og maayo ang biktima tungod sa pagpunay og hulga sa suspek nga ipakatap ang hulagway sa biktima diha sa internet hangtud nga si Derick nga nakaila niya sa mall miboluntaryong ‘motapal’ sa kuwang nga igbalayad sa biktima ngadto ni De Jesus.

Tungod sa pagpunay og paningil ni De Jesus nagpakitabang nalang siya sa NBI kinsa mihimo dayon og entrapment operation pinaagi sa paghaylo sa suspek nga bayran na sa biktima ang P15 mil bugti sa giingong mga hubong hulagway nga gikuptan sa biktima nga suspetsado.

Ang suspek nadakpan sa usa ka mall sa grupo ni NBI agent Bernard Dela Cruz ug nakuha gikan kaniya ang ipod nga adunay uban pang mga hubong hulagway sa kababayen-an gawas sa biktima.

Nagduda si Dela Cruz nga ang laing tulo ka babaye mga biktima usab sa suspetsado sa maong modus operandi. Nasuta usab nila nga si Derrick, De Jesus, Zayura ug ang suspek usa ra.

Kasong Robbery/Extortion in relation to Republic Act 7610 ang ilang gipasaka batok sa suspek, gitun-an pa nila ang dugang kasong ilang ipasaka kang Antonio.

Ang suspetsado wala motubag sa pasangil batok kaniya dihang gibasahan sa reklamo batok kaniya.  - BANAT NEWS