Kayo miulbo sa barko napawong dayon

CEBU, Philippines - Usa ka barko sa 2GO Travel ang nasunog apan napawong dayon ang kayo ug walay bisan usa ka pasahero niini nga naangol didto sa kadagatan sa Batangas kagahapon  sa alas 9:15 sa buntag.

Ang 2GO Travel mibutyag nga ang ilang barko nga Cebu Ferries 1, usa ka RoRo nga sakyanan sa kadagatan mibiyahe paingon ngadto sa Caticlan nga may gilay-ong 15 milyas gikan sa puwerto sa Batangas dihang kalit lang kining misilaob samtang naglawig sa dagat.

Nasuta sa mga tripolante sa barko nga ang kayo nagsukad sa panghaw sa maong barko nga nahimutang sa kilid sa starboard.

Hinuon gumikan sa kaabtik sa mga tripolante niini dali kaayong napawong ang kayo nga nakaulbo sulod sa 15 minutos.

Ang mga lokal nga otoridad gipahibawo dayon sa maong hitabo ug ang tagdumala sa 2GO nangayo usab dayon og panabang sa SuperCat nga maoy mihatud sa mga pasahero ngadto sa ilang destinasyon.

Hinuon giatiman dayon sa tagdumala sa maong barko ang mga pasahero niini nga mahatod nga luwas ug malinawon ngadto sa ilang destinasyon, matud ni Jose Manuel Mapa, Executive Vice President of ATS Consolidated.  - BANAT NEWS