Batan-ong kawatan gipusil sa sikyu

CEBU, Philippines - Samaran ang usa ka bayong-bayong human kini pusila sa security guard sa Bankal National High School sa barangay Bankal sa dakbayan sa Lapulapu sa milabay’ng gabii.

Ang biktima mao si Johnny (di tinuod nga ngalan) 14, ug residente sa maong dapit.

Samtang ang nakapusil mao si Bernard Mahinay, 30, ulitawo nga sakop sa Queen Security Agency ug maoy nagbantay sa nahisgutang eskuylahan.

Si PO2 Luisito Ernie sa kapolisan sa homicide section sa maong dakbayan mibutyag  sa Banat News nga napusilan sa suspetsado ang biktima tungod kay gikawat kuno niini uban sa wala hiilhi niyang kauban ang mga lingkoranan nga gipundok didto sa luyong bahin sa eskuylahan.

Matud pa ni PO2 Ernie nga nakasulod ang tulo ka batan-on uban sa biktima pinaagi sa pagkatkat sa koral sa tulunghaan.

Gani matud pa niya nga gipasa-pasa sa tulo ang mga arm chair pagpagawas niini   sa koral gikan sa compound sa tulunghaan

Midugang si PO2 Ernie nga bisan gibadlong na sa suspek wala gyud mopatuo ang biktima ug ang duha ka kauban niini hinungdan nga gilanit sa guwardiya ang iyang service firearm punting ngadto sa biktima nga napaboran sa iyang panan-aw.

Natagak si Johnny sa yuta human kini maigo sa bukton. Samtang ang mga kauban sa biktima dali kaayong nakasibat ug nakapahilayo sa maong lugar.

Ang biktima gihatod dayon ngadto sa tambalanan samtang ang suspetsado mitahan usab dayon sa iyang kaugalingon ngadto sa kapolisan uban sa iyang armas nga gigamit sa pagpamusil ug karon gitanggong na siya sa prisohan sa kapolisan samtang nagpaabot sa tukmang kiha nga isang-at batok kaniya.  - BANAT NEWS