Awto nga gigamit sa drive-by shooting nasakpan

CEBU, Philippines - Sa katapusan, nasakpan na sa kapolisan sa dakbayan sa Sugbo ang awto nga gigamit sa drive- by shooting sa miaging buwan nga mikalas ug miangol sa pipila ka kinabuhi sa mga batan-ong sakop sa gang.

Kini human bulontaryong gisurender sa inahan sa usa sa lima nga nadakpan sa kapolisan niadtong Lunes sa buntag ang maong sakyanan.

Ang awto nagtangag sa plakang YGD-234 nga Kia Rio kolor Olive-Gray.

Si Chief Insp. Romeo Santander, hepe sa City Intelligence Branch (CIB) nga nahinabi sa mga tigbalita nagkanayon nga nadakpan nila niadtong Lunes sila si Nelgin Dacalus, Mark Joseph Abellanosa, Marion Carl Camomot, Ernesto Andog, pulos taga barangay Kinasang-an ug ang 17-anyos nga bayong-bayong ug 15-anyos nga dalagita.

Human sa ilang   pagkasikop, didto mahibaw-i sa kapolisan   ang awtong gigamit sa drive-by shooting nga nahitabo niadtong Enero 1, Pebrero, 5, 12, ug 15.

Matud ni Santander nga kauban ra sa mga dinakpan si Rhene Aligato Baclaan alyas ‘Insik’ nga taga Kinasang-an ug sakop sa gang nga una nilang nadakpan.

Ang awto didto kuhaa sa kapolisan sa inahan sa 17 anyos nga bayong-bayong sa barangay Mambaling human kini isurender sa inahan niadtong Martes sa hapon.

Matud ni Santander nga si Dacalus alyas ‘Bao’ ug Camomot maoy kauban ni Baclaan alyas ‘Insik sa ilang pagpamusil nga nagsakay sa maong awto

Tan-awon pa sa kapolisan kun unsay status sa bayong-bayong niining iyang pagtug-an sa mga binuang sa iyang mga kauban. Matud niya nga ang sakyanan iyang giregalo sa iyang 17-anyos nga anak kay graduating kini sa high school.

Apan wala siya makahibawo nga gigamit kini sa drive-by shooting sanglit kasagaran kaadlawon na kining mahiuli sa ilang balay.

Matud sa inahan nga adunay higayon nga iyang pangutan-on ang iyang 17-anyos nga anak kun asa ang sakyanan apan tubagon siya niini nga gigamit sa iyang higala kay adunay gihimong project sa I.T park. 

Apan alang sa inahan wala gyud siya magduda sa iyang anak nga nalambigit sa drive- by shooting sanglit mitug-an kaniya si Camomot nga adunay panahon nga ilang abangan ang sakyanan.

Giangkon ni Santander nga naglisud gyud sila pag-ila dayon sa sakyanan sanglit walay nakatug-an bahin sa prefix niini gawas sa numero nga 234.

Tungod niining maong kalamboan, hingpit na nga nasulbad ang maong kaso, matud pa ni Santander apan dili siya makapaniguro nga wala nay laing drive-by shooting dinhi sa dakbayan sa Sugbo kay posibling aduna pay laing motumaw nga grupo.  - BANAT NEWS