Mga miyembro sa PCWC gipanghulga

CEBU, Philippines - Nakadawat og hulga sa ilang kinabuhi ang pipila ka sakop sa Provincial Commission for the Welfare of Children (PCWC) pinaagi sa text messages.

Kini ang gibutyag ni Bise-Gobernador Agnes Magpale, ang chairman sa PCWC, human misumbong kaniya ang kaubanan sa konseho.

Ang mga nakadawat og hulga mao sila si Provincial Social Welfare and Development Officer Marivic Garces ug Piskal Lolita Lumanta.

Ang maong hulga ang nakapaaghat kang Garces nga mag-ilis nalang og numero sa iyang cell phone sanglit gihasolan siya sa mga text ug tawag nga iyang nadawat.

Gipakagamay hinuon ni Garces ang maong mga text message ug gani wala niya kini isipa nga hulga apan iyang giangkon nga nakahasol kaniya.

Ang mga text message nagkanayon nga, “malditaha gud diay nimo mam, di gyud ka madag areglo?”, “Gahi gyud diay mo diha, barato ra bayang kinabuhi” ug “Hawod gyud kaayo ka diha mam kay ikaw man gyuy ila padesisyonon?”

Ang PCWC maoy nag-atiman sa mga kaso nga naglambigit sa mga abuso sa kabataan ug kababayen-an.

Matud pa ni Garces nga daghan sila og mga kaso nga gikuptan hinungdan nga dili siya makatumbok kung unsa nga kaso ang nalambigit sa maong mga text message.

Gibutyag ni Garces nga adunay sa habig sa mga akusado nga adunay ihangyo kanila apan ila kining balibaran sanglit gusto sila nga sa korte mahusay ang kaso.

Si Lumanta nagdumili hinuon pagbutyag kung unsa usab ang mga hulga nga iyang nadawat.

Apan si Magpale miingon nga hulga gyud ang nadawat ni Lumanta.

Labing bag-ong kaso nga gikuptan karon sa PCWC mao ang kasong pagpangabuso sa bata batok sa usa ka Swedish.

Sama kang Garces, dili usab makatumbok si Magpale kung unsa nga kaso ang nalambigit sa maong mga hulga.

Si Magpale nangayo na og tabang sa hepe sa Cebu Provincial Police Office, Sr. Supt. Patrocenio Comendador alang sa seguridad ni Lumanta samtang si Garces miingon nga mag-amping lang siya sa iyang mga lihok.   - BANAT NEWS