Canvasser og tambal gipatay

CEBU, Philippines - Usa ang namatay samtang duha ang angol nga naglambigit sa usa ka retiradong polis human pusila sa duha ka wala hiilhing kriminal didto sa ganghaan sa Vicente Sotto Memorial Medical Center (VSMMC) kagahapon sa alas 8:45 sa buntag.

Ang biktima nailhan sa kapolisan nga si Loe Mabotad Padayao alyas Lupin, 26, ulitawo nga may kapuyo ug canvasser og tambal sa botika nga taga sitio Kawayan, barangay Sambag 2 ning dakbayan sa Sugbo.

Samtang ang naangol mao sila si retired Supt. Virgilio Noval, 64, nga taga barangay Maghaway, dakbayan sa Talisay, ug Angelina Tapdasan, 64, taga sitio Luyang, barangay Ocaña, dakbayan sa Carcar.

Si Padayao nasabak sa mga bala sa ulo, bukton ug nagkalainlaing bahin sa lawas nga maoy nakaingon sa iyang kamatayon human atimana sulod sa pipila ka gutlo sa mga doktor sa VSMMC.

Samtang si Noval naigo usab sa tiyan ug si Tapdasan nasabak usab sa tiil.

Si Padayao nailhan nga pag-umangkon ni anhing Tata Negro nga giingon sa kapolisan kaniadto nga nalambigit sa pagpayuhot og gidiling drugas ug gipusil patay sa wala hiilhing kriminal didto sa barangay Lorega ning dakbayan sa Sugbo.

Samtang si Noval sa wala pa moretiro sa serbisyo, siya maoy nahimong Deputy Group Director sa Regional Mobile Group (RMG)-7 nga nagbase sa lungsod sa Sibonga nga karon gihimo nang Regional Public Safety Batallion (RPSB).

Sa pasiunang imbestigasyon sa Homicice Section nila ni SPO4 Rey Cuyos, SPO1 Ruth Violango, PO3 Wetzell Berry ug PO2 Nilo Aventurado nasayran nga nagbarog lang ang biktima gawas sa ganghaan sa maong tambalanan nga nagpaabot og customer nga mogawas gikan sulod sa tambalanan.

Apan usa ka wala hiilhing lalaki nga nagsul-ob og jacket ug crash helmet ang miduol kang Padayao ug deretso kining gipusil sa makadaghang higayon sa bukobuko, liog, ulo ug ubang bahin sa iyang kalawasan.

Matud sa kapolisan nga niadtong higayona si Noval gikatahong paingon na untang mosulod sa tambalanan kay giingong magpa check-up kini sa iyang sakit nga diabetes atol sa pagpamusil.

Samtang si Tapdasan gikan sa sulod sa tambalanan kuyog sa iyang igsoong babaye ug paggawas niini sa ganghaan, ang iyang igsoon mibalik usab og sulod kay giingong adunay nabiyaan hinungdan nga nagbarog si Tapdasan kilid sa ganghaan dihang nalasikan ang iyang tiil   sa bala gikan sa armas sa mipusil kang Padayao.

Matud sa kapolisan nga gideritso pagsulod sa Emergency Room (ER) sa VSMMC si Noval gumikan sa iyang samad sa tiyan.

Human sa hitabo ang mamumuno daling misakay sa nagpaabot nga motorsiklo nga gimaneho sa kauban niini nga nagsul-ob gihapon og crash helmet ug mipasirit pahilayo sa lugar. Ang mga sakop sa Mobile Patrol Group ug ubang kapolisan daling mihimo og blocking force human maalarma ang hitabo apan napakyas sila pagsikop sa mga kriminal.

Nakapunit ang kapolisan sa crime scene og tulo ka kabhang ug duha ka tingga nga bala sa .45 kalibre nga pistola.

Si Sr. Insp. Jul Mohammad Jamiri, hepe sa Homicide Section nga nahinabi sa Banat News nagkanayon nga daghan kaayo silang gisubay karon nga posibling anggulo sa pagpusil patay kang Padayao.

Kini mao ang panimawos sa personal nga atraso ni Padayao sanglit daghan kuno kining gikaaway sa iyang pagka- canvasser og tambal sa VSMMC, ikaduha aduna pa kuno kini gikalalis nga usa sa mga tag-iya og botika atbang sa VSMMC.

Ikatulo mao ang gidiling drugas sanglit pag-umangkon siya ni anhing Tata Negro, ug ang ikaupat mao ang pagka notadong kawatan sa biktima, nga gani maoy hinungdan nga gianggaan siya og ‘Lupin.’

Matud ni Jamiri nga adunay kaso sa pagpangawat si Padayao kaniadto nga natala sa Fuente Police Station dihang si Supt. Arnel Banzon pa ang hepe ug nadakpan usab siya kaniadto sa Theft and Robbery Section (TRS).

Si Jamiri miingon nga si Padayao gayud ang tuyo sa mamumuno ug napagan lang sila si Noval ug Tapdasan.

Si Rebecca Llagono, 34, ig-agaw ni Padayao mitug-an sa Banat News nga misulti kaniya ang kapuyo sa biktima nga si Sally nga dili unta diay mo-duty ang biktima sa iyang pagka -canvasser og tambal kagahapon sa buntag.

Matud ni Llagono nga gipukaw ni Sally ang biktima apan mibalibad unta kini nga dili mo-duty kay gikapoy ang lawas apan pagka alas-8:00 pasado kagahapon sa buntag mao nalay nahibaw-an sa kapuyo nga gipusil na ang biktima.

Usa ka tigulang lalaki nga manindahay og sigarilyo kilid sa VSMMC nga nahinabi sa Banat News nagkanayon nga nagparking nang daan ang motorsiklo sa duol sa ganghaan nga gisakyan sa kriminal.

Nagtuo siya nga adunay laing gipaabot apan nakurat nalang siya dihang gipusil sa nag-backride niini ang biktima sa makadaghang higayon.  - BANAT NEWS