NTC mipatinda lang gihapon sa mga vendor

CEBU, Philippines - Ang kagamhanan sa dakbayan sa Talisay mopasusi sa Nacario Trade Center (NTC) sa barangay Tabunok una mohatag og occupancy permit niini.

Kini tungod sa ilang nadawat nga report nga giingong duna gihapoy nagpabiling mga vendor sa maong pribadong merkado   nga naninda og bugas, buwad, isda, karne, itlog ug uban pang mga poultry product.

Ang korte miluwat na og mando pagdili sa NTC nga kapanindahan sa mga produkto nga gipamaligya sa bag-ong merkado sa Lagtang,

Gawas lang kun tumanon sa tag-iya sa NTC ang maong mando dili moluwat ang kagamhanan og permiso kanila nga kapanindahan ang ilang edipisyo. Kun wala silay permiso , makatarunganon lang nga pasirad-an sila sa kagamhanan, sumala ni Arturo Bas ang public information officer (PIO) sa dakbayan.

Si Bas, mibutyag sa mga tigbalita kalabot sa nadawat nilang report bahin sa padayon sa NTC nga pagpatinda og mga  produkto nga gidili sa korte kanila.

Si Mayor Socrates Fernandez mimando sa market task force sa pagsusi sa maong taho ug kun mapamatud-an kini nga tinuod ang kagamhanan sa dakbayan sa Talisay dili gayud moluwat og occupancy permit ngadto sa NTC.

Si Bas mibutyag   usab nga gimando sa mayor nga padugangan ang miyembro sa task force aron pagsikop sa mga vendor nga naninda lang gihapon sa NTC.

Ang NTC gipatak-opan sa kagamhanan tungod kay namatigayon kini nga walay business permit.

Apan dihang misaad ang tagdumala niini nga dili na sila modawat og mga vendor, andam na unta ang kagamhanan sa pagluwat og occupancy permit ning maong edipisyo.

Sa laing bahin, sugod niadtong Marso 1, 2012 gihunong una sa siyudad ang libreng sakay sa mga mamalitay sa bag-ong merkado sa Lagtang. Kini tungod kay gikuwenta pa sa kagamhanan kun makatabang ba gayud ang maong sistema sa pagpakusog sa halin sa mga mamaligyaay sa bag-ong merkado.  - BANAT NEWS