Sugboanong bayani ipatudlo sa DEP-ED

CEBU, Philippines - Ang Department of Education (DepEd) angay nga mosilsil sa alimpatakan sa kabataan pinaagi sa pagsukip sa mga subject ug mga leksyon sa mga publikong tunghaan bahin sa mga Sugboanong bayani nga wala na karon hiilhi sa bag-ong henerasyon.

Kini ang unod sa suwat nga gipadala ni kanhi Dangerous Drugs Board DBB Undersecretary Paul Clarence Oaminal ngadto kang Mayor Michael Rama sa milabay nga kasaulogan sa ika-75  nga kasumaran sa Charter Day sa dakbayan niadtong Pebrero 24, 2012.

Sa iyang suwat gihangyo ni Oaminal ang mayor nga moawhag unta kini sa DepEd nga pahatagan og gibug-aton sa mga magtutudlo sa elementarya ug sekondarya dinhi sa Sugbo ang bahin kanila ni Dr. Jose Rizal, Andres Bonifacio ug ilabi na sa mga matawag nga bayani nga taga Sugbo.

Matud pa ni Oaminal nga sa pagkakaron napasagdan na ug wala na gyud hatagi og importansiya nga ma-edukar ang mga Sugboanong tinun-an sa mga nasudnon ug Sugboanong bayani nga gihimoan og ngalan sa mga kadalanan sama sa F. Llamas St., C. Padilla St., Andres Abellana St., ug uban pa kansang mga ngalan napatik sa mga kadalanan dinhi sa dakbayan tungod sa mga maayo nilang binuhatan.

Kini pinaagi usab sa ordinansa nga napasar sa konseho sa dakbayan nga naghatag og pasidungog sa mga ngalan sa maong mga Sugboanon nga nakahimo og mga maayong buhat dinhi sa Sugbo niadtong buhi pa sila.

Gani giugkat usab ni Oaminal ang ngalan ni Don Vicente Rama nga apohan ni Mayor Rama nga naila na nga father of charter day sa dakbayan apan daghan pa gihapon sa mga bag-ong henerasyon ang wala gyud masayod sa kinatibuk-ang kaagi niini.

Tungod niini gisugyot ni Oaminal nga ipaapil gyud sa leksyon sa mga tinun-an ang kaagi sa mga kaugalingong Sugboanong bayani nga alang niya sa pagkakaron napasagdan lang og hinay hinay nga nakalimtan ang mga maayo nilang mga buhat.

Nunot niini gitakda usab nga makigtagbo si Oaminal ngadto kang Gobernador Gwendolyn Garcia karong sunod buwan alang gihapon sa maong katuyoan nga ipa-ugkat ang mga kaagi sa mga Sugboanong bayani aron mabuhi sa panumdoman sa mga batan-on ang mga maayo nilang binuhatan.

”Kay kaning atong mga bayani desiplinado ug modelo sa katarung unya way mga adik niini”, tipik sa asoy ni Oaminal.