Pagbantay sa dagat ipadayon

CEBU, Philippines - Gipahayag sa kagamhanan sa lalawigan nga magpadayon ang higpit nga pagbantay sa kadagatan dinhi sa lalawigan sa Sugbo sa bag-ong opisyal nga modumala sa Naval Forces Central (Navforcen).

Kini human mopahibawo kang Governor Gwendolyn Garcia ang labaw’ng opisyal sa Navforcen dinhi sa Cental Visayas nga si Commodore Zyril Carlos nga mobiya na siya dinhi sa Sugbo kay idestino na usab siya sa laing dapit. 

Si Carlos dako kaayo og nahimo sa kampanya sa gobernador sa pagpakiggubat batok sa illegal nga panagat sa kadagatan dinhi sa lalawigan sa Sugbo.

Apan kay idestino man si Carlos nga chairman sa Bids and Awards Committee sa Armed Forces of the Philippines sa Camp Aguinaldo sa kaulohan, mapugos kini sa pagbiya dinhi sa Sugbo.

Wala pa hisayri sa gobernador kun kinsay mohulip kang Carlos nga magdumala sa Navforcen sa Central Visayas apan gipasalig sa gobernador nga suportahan niya ang maong ahensya sa mga panginahanglan niini ilabi na ang bahin sa paggukod sa mga dinamitiro, tigpanghilo og isda ug mga tiggamit og pino og mata nga pukot ug uban pang matang sa illegal nga panagat. 

Sa panahon ni Carlos daghang mga pinabuthang isda ug pinayuhot nga mga gasang; higanting pawekan ug uban pa gikan sa mga illegal nga mananagat ug mga negosyante   ang nasakmit sa mga sakop niini.

Busa mapasalamaton usab kaayo si Garcia sa dakong natampo ni Carlos ug sa mga sakop niini sa pakiggubat niya (Garcia) sa illegal nga panagat.

Malaumon usab ang gobernador nga ang mohulip kang Carlos lig-on usab nga katabang sa kagamhanan sa lalawigan sa pagpatunhay   sa mga balaod sa kadagatan.  - BANAT NEWS