Centcom mihimakak nga naay nang-recruit aron mag-kudeta
CEBU, Philippines - Gipasalig sa kadagkuan sa Central Command nga nagpabilin ang ilang pagtamod sa chain of command ug miklarong walay recruitment alang sa giingong kudeta nga ilang na-monitor sa Kabisay-an.
Si Lt. Col. Christopher Tampus ang tigpamaba sa Central Command mipahibawo nga wala silay nadawat nga report nga dunay “massive recruitment of soldiers” aron moapil sa coup d'état plot (kudeta) batok sa administrasyon ni Presidente Benigno "Noynoy" Aquino III.
Ang pasalig giluwatan ni Tampus taliwa sa pamahayag sa kanhi lider sa gibansagang Oakwood Mutiny nga karon Senador nga si Antonio Trillanes IV nga nag-ingong adunay mga kanhi sakop sa nakalabay’ng administrasyon ang nagpahigayon og “massive recruitment” sa mga sakop sa militar. Matud ni Tampus, nga nahinabi sa igsuong pamantalaan sa Banat News nga The Freeman wala nila gisalikway ang posibilidad apan masaligon kining di kini mahitabo sa Centcom.
Base sa reports, ang mga recruiters migamit og “Red scare tactic” diin ang mga sundalo gipasidan-an nga ang Aquino administration gilibotan na og mga nagtisok og idolohiyang komunista.
Si Lt. Gen. Ralph Villanueva, pangulo sa Central Command naglibot sa tanang hurisdiksyon sa Centcom aron maminaw sa mga problema sa mga sakop niini,matud pang Tampus .
“Ang atong kasundaluhan ug atong mga opisyales are committed to the service and they are all professional – we follow the chain of command,” pasabot pang Tampus.
Migawas ang maong mga balita tungod sa balitang ang giingong lider sa National Democratic Front nga si Jose Maria Sison gikatahong mopauli dinhi sa Pilipinas ug giingong hatagan sa gobiyerno og posisyon isip consultant. (BANAT NEWS)
- Latest
- Trending
