CEBU, Philippines - Pormal nang giproklamar kagahapon sa hapon nga mayor sa lungsod sa Compostela si Joel Quiño human sa gihimong re-canvassing sa Commission on Election (COMELEC) en Banc sa kaulohan.
Sa report sa TV Patrol Central Visayas, si Quiño milabaw og kapin usa ka libo batok sa mireklamong kanhi mayor Ritchie Wagas.
Sa dihang gi-interbyu si Quiño sa maong report mibutyag kini nga siya nakaangkon og 12, 076 ka botos samtang si Wagas 9,331 lang ka botos.
Midugang si Quiño nga iya pang tapokon ang tanang konsehal aron pagasabutan og kanus-a sila molingkod sa buhatan aron ila usab gilayon nga matuki ang mga angayan nga buhaton sa ilang mga konstituwente.
Napanglantawan ni Quiño nga ilang unang buhaton mao ang pagtubag sa panginahanglanon sa katawhan nga dugay nang wala matagad sulod sa duha ka tuig tungod sa maong kakulian.
Susama nalang sa mga basic services nga wala mahatag kaniadto nga wala pay mayor nga milingkod.
Gihulagway usab ni Quiño nga dili tanan niyang konsehal ang nakadaug diin usab usa ka konsehal ni Wagas ang nakasulod nga si Alfredo Cabatingan.
Kahinumduman nga nagkagubot ang lungsod sa Compostela human ang kampo ni Wagas miprotesta sa kadaugan ni Quiño nga misampot nga wala na hinooy mayor nga milingkod sa nahisgutang lungsod. (BANATNEWS)