Rama di mobayad sa mga rallos

CEBU, Philippines - Si Mayor Michael Rama mipasidaan nga bisan unsaon siya og hulga sa korte dili na mausab ang iyang baroganan nga dili mobayad ang kagamhanan ning siyudad sa P133 milyones nga gipangayo sa pamilyang Rallos.

Sa pagkakaron matud pa ni Rama nga gihikay na sa mga abogado sa kagamhanan ning dakbayan ang pagsang-at sa “motion for reconsideration” kalabot sa bag-ohay nga hukom sa korte nga nagmando sa mga banko nga gidepositohan sa kuwarta sa siyudad nga pabayran ang mga Rallos. 

Matud pa ni Rama nga dili gyud angayang bayaran ang maong yuta gumikan kay usa kini ka “road lot” ug dili siya buot nga usik-usikan ang kuwarta sa gobiyerno .

Naglaraw karon ang siyudad nga modangop sa Court of Appeals ug sa uban pa nga nasudnong ahensya aron maprotektahan   niini ang salapi sa kagamhanan sa dakbayan nga anaa sa mga bangko. Ang legal consultant ni Rama nga si manlalaban Jade Ponce mibutyag nga magpadala usab sila og suwat ngadto sa Commission on Audit (COA) aron motingog ug manginlabot kini ning maong kaso.

 Si Rama nagkanayon nga nakita gyud niya ang kamatuoran dihang personal niyang gi-inspeksyon sa 3,000 metro kuwadrado nga lote nga nahimutang sa Barangay Sambag 1 niining dakbayan ug iyang nasuta nga gipamuy-an na kini og mga tawo.

Apan ang maong yuta nadeklarar na nga “road lot” sukad pa niadtong 1941 busa dinhi milig-on ang rason sa mayor nga dili gyud angayang   bayran ang maong yuta.

Matud pa ni Rama nga    daghan na kaayong proyekto ang mabuhat sa P133 milyones. (/WC)  (BANATNEWS)