Kaso vs babayeng civilian military agent gibasura

DUMAGUETE CITY, Philippines  – Gibasura sa piskalya ang kaso batok sa usa ka babayeng nangangkong civilian agent sa usa ka military intelligence unit kinsa nadakpan sa nakalabay’ng bulan tungod sa pasangil nga suway pagpalusot niini og armas sulod sa prisuhan sa Bayawan City, Negros Oriental.

Ang babaye nga giilang si Teresa O. Balungcas, nga taga sitio Umod, Barangay Maninihon sa Bayawan City nangangkong usa siya ka civilian agent sa 7th Regional Intelligence and Security Unit (RISU) sa Philippine Army sa Camp Lapu-lapu, Cebu City, matud pang Sr. Insp. Teddy Picardal.

Si Balungcas gibuhian human si Bayawan City Prosecutor Peter Balbuena mibasura sa kaso niadtong Miyerkules atol sa preliminary investigation sa kasong illegal possession of firearms nga gipasaka batok kaniya matud pa ni Picardal.

Ang piskalya mipagawas og resolusyon base sa samang nahitabong kaso sa Bohol diin usa ka civilian agent sa militar   nakapresentar og lehitimong papeles sa armas.

Nasuta nga mibisita sa maong bilanggoan si Balungcas aron bisitahon ang usa ka suspek nga gun-for hire nga si Jasper Tanasan aron magpangutana bahin sa anak niini nga si Benhie Balungcas kinsa na-missing sukad pa niadtong Nobiyembre 2010.

Sa nangaging mga police reports gidudahang ang grupo ni Tanasan maoy responsable sa pagkawala sa batan-ong Balungcas.

Hinuon ang Bayawan police mipasaka og motion for reconsideration ug miinsister nga dunay sayop o kadudahan ang gipakitang tulo ka mga MO nga giisyu sa usa ka tawo sa susamang petsa gikan sa susamang military unit. (BANATNEWS)