Bana mipusil patay sa asawa

CEBU, Philippines - Patay nang miabot sa tambalanan ang usa ka asawa human kini gipusil sa iyang bana atol sa ilang panaglalis diha sa Lower Casili dakbayan sa Mandaue sa milabay’ng kaadlawon.

Ang biktima mao si Ginalyn Bihag, 33, residente sa maong dapit ug adunay duha ka mga anak samtang ang suspek mao ra ang bana niining si Venerando Bihag Jr.,38, mitahan sa kapolisan.

Matud pa ni PO3 Marvin Fegarido sa Investigation Detection and Management Bureau (IDMB) sa Mandaue City Police Office unang nakaresponde ang mga sakop sa Station 6 apan ang alarma gitawag suicide.

Pag-abot sa kapolisan sa panimalay sa magtiayon wala na diha ang biktima tungod kay gidala na kini sa tambalanan sa mga kabanay hinungdan nga ilaha nalang gipangita ang armas nga gigamit sa ‘paghikog’ sa ginang.

Apan wala nila kini marekober hinungdan nga ilahang giimbitar unta ang bana niini alang sa dugang impormasyon kabahin sa nahitabo apan matud pa ni Fegarido dihang ilang gisukitsukit si Venerando miangkon kining iyang napusilan ang asawa ug dili tinuod nga naghikog kini.

Gikatahong kauban ni Venerando sa pagtahan ang iyang ugangan nga si Sarona Estole, 60, dala ang kalibre 45 pistolang may upat ka kabhang niini nga giingong maoy gigamit sa krimen. Matud pang Fegarido wala motug-an ang suspek sa hinungdan nganong iyang napusilan ang asawa.

Apan base sa pasiunang imbestigasyon sa kapolisan sa Station 6 nasuta nga sa milabay’ng alas 2:25 sa kaadlawon nagkalalis ang magtiayon. Gidudahang selos ang hinungdan niini nga misangpot sa pagpamusil.

Kasong parricide ang gikatakdang ipasaka batok kang Venerando.(/EIM) (BANATNEWS)