Vietnam miprotesta vs China

CEBU, Philippines - Subling miulbo ang tensyon tali sa nasud sa Vietnam ug China human ang Vietnam mipasangil nga giatake sa mga Intsik ang ilang mga mananagat diha sa giilogang teritoryo sa South China Sea.

Si Vietnamese Foreign Ministry spokesman Luong Thanh Nghi nagkanayon nga ang gihimo sa China seryosong nakaapekto sa soberiniya sa ilang nasud ug nagbutang sa peligro sa kinabuhi sa ilang mga molupyo ug pagkawagtang sa ilang mga kagamitan.

Ang state-controlled newspaper nga Vietnam News mipagawas og balita niadtong Huwebes nga namasangil sa China nga migamit sa ilang kusog aron hulgaon ang onse ka mga Vietnamese nga mananagat niadtong Pebrero 22 aron babagan silang makasulod sa Paracel islands sa tuyo unta nilang malikayan ang bagyo.

Sumala pa sa mga mantalaan ang mga sundalong Intsik miatake sa maong mga mananagat ug misuway pa pagkumpiskar sa ilang mga gamit. Ang insidente giprotestahan sa Vietnam diha sa Chinese Embassy sa Hanoi, ug nangayo og danyos pabor sa mga mananagat ug mimando ipahunong na ang pagpangatake sa mga Intsik.

Apan si Chinese Foreign Ministry spokesman Hong Lei mihimakak nga giatake sa ilang pwersa ang mga mananagat tungod kay ang nahitabo giabog ra nila ang mga barko sa Vietnam palayo sa giangkong kadagatan sa China duol sa Paracel Islands nga gitawag nilang Xisha Islands.

Ang South China Sea o West Philippine Sea gituohang adunay dakong deposito sa natural gas ug petrolyo ug karon giilogan sa unom ka mga nasud nga naglakip sa Pilipinas, Malaysia, Vietnam, Taiwan, Brunie ug China. Sa unom, bugtong ang China lang maoy layo sa maong kadagatan. (BANATNEWS)