Nag-inom gipusil usa patay

CEBU, Philippines - Patay ang usa ka tawo nga gipusil sa wala hiilhing mga lalaki nga nagsakay og motorsiklo alas-3 pasado ang takna sa miaging kaadlawon sa barangay Ibo, dakbayan sa Lapulapu.

Si PO1 Bregido Paca sa Homicide Section sa kapolisan sa maong dakbayan nga nahinabi sa Banat News miingon nga ang namatay nailhan lang sa pangalan nga ‘Harold.’

Sumala pa niini kuyog sa biktima ang usa ka Ramon Senadjan nga nakig-inom sa usa ka tindahan sa maong dapit dihang kalit miabot ang duha ka mga lalaking sakay og motorsiklo ug gipusil sa backrider ang biktima.

Human niini mipabulhot palayo ang mga gikatahapan, wala usab makuha ang plate number sa motorsiklo sa duha.

Daling gidala sa mga sakop sa Emergency Rescue Unit Foundation (ERUF) ang biktima sa Lapulapu City Hospital apan patay na kini. Lima ka mga kabhang sa kalibre 45 nga bala ang nakuha diha sa crime scene. (BANATNEWS)