CEBU, Philippines - Gibanabanang P150 mil nga kanditad sa nubain ampules ang nasakmit sa mga sakop sa Regional Anti-Illegal Drug Special Operation Task Force gikan sa usa ka giingong pharmacist kagahapon sa hapon diha sa barangay Zapatera, dakbayan sa Sugbo atol sa ilang gipahigayon nga buy-bust operation.
Ang suspetsado mao si Richard Villahermosa, 39, residente sa barangay Pakigne, lungsod sa Minglanilla.
Si Senior Inspector Henrix Bancoleta kinsa maoy nangulo sa operasyon mibutyag nga nakadawat sila og report bahin sa pagpamaligya ni Villahermosa sa maong mga tambal ug dihang ilang nakumpirmar gihimo dayon ang buy-bust operation.
Gamit ang usa ka police decoy kunohay mopalit kini og balor og P10 mil nga mga nubain ampules sa suspek ug ang duha nag-abot atubangan sa usa ka tunghaan sa barangay Zapatera kagahapon sa hapon.
Si Villahermosa giingong naabot sa lugar sakay sa iyang sakyanan ug dihang gidawat niini ang marked money gisikop dayon kini sa mga polis.
Matud ni Bancoleta 12 ka kahon nga may sulod nga 1,200 ka buok nubain ampules nga mokantidad og P150 mil sa street value ang ilang nakuha gikan sa suspek. Giingong base sa napatik sa kahon gikan kini sa nasud sa Pakistan.
Si Bancoleta midugang nga si Villahermosa giingong nagsuplay og nubain sa Kamagayan ug Junquera area. (BANATNEWS)