Saleslady napunggit sa van patay

CEBU, Philippines - Namatay ang usa ka saleslady sa usa ka dakong mall dihang nadasmagan sa naghaguros nga rent a car diha sa sitio Seabreeze sa barangay Mactan, dakbayan sa Lapulapu ala-1 pasado ang takna sa miaging kaadlawon.

Ang namatay mao si Maila Sabiog Mundo, 20, lumad nga taga Don Victoriano, Misamis Occidental apan temporaryong napuyog sa maong siyudad.

Natanggong na usab sa karsel ang drayber nga nakadasmag kaniya nga si Efren Gorre Dejito, 39, taga barangay Labogon sa lungsod sa Tabogon kinsa maoy nagmaneho sa Toyota Hi-Ace Grandia nga giabangan niini sa usa ka rent a car company.

Si PO1 Bernard Capuyan sa traffic division sa kapolisan sa maong dakbayan nga nahinabi sa Banat News miingon nga gikan pang mitambong og birthday party sa iyang higala ang biktima kuyog sa hinigugma niining si Kenny Anueva Baratas dihang nahitabo ang aksidente.

Matud pa ni Capuyan gikan sa merkado ug nanaug kini sa maong lugar ug nagdali sa paglabang sa pikas habig sa dalan apan mao sad ang pag-agi ni Dejito nga may mga sakay nga guest gikan sa Mactan Cebu Internation Airport paingon sa usa ka hotel sa maong dakbayan.

Si Capuyan nagtuo nga kusog ang dagan sa sakyanan ni Dejito tungod kay nalagpot gyud ang biktima ug nadakdak ang lawas sa sementadong karsada ug namatay kini sulod sa Mactan Doctor’s Hospital pagkakaadlawon. (BANATNEWS)