Nagmotor nabangga sa poste patay

CEBU, Philippines - Namatay ang usa ka lalaki human mabangga sa poste ang gimaneho niyang motorsiklo didto sa national highway sa barangay Poblacion, lungsod sa Moalboal pasado alas 2:00 sa kaadlawon kagahapon.

Ang biktima nailhan nga si Joel Tabanao, 41, taga barangay Tunga sa maong lungsod

Sa pakighinabi sa Banat News ni PO1 Melvin Delica sa Moalboal Police Station misaysay kini nga base sa ilang nakuha nga impormasyon nasuta nga ang biktima nagsakay sa iyang Honda Wave 100 nga may marka nga ‘For Registration’ ang plaka ug paatubang ngadto sa Poblacion West.

Apan pag-abot niya sa nahisgutang lugar wala makakontrol ang biktima sa dagan sa iyang sakyanan gumikan sa kakusog nga dagan niini ug nabangga kini sa usa ka poste sa suga daplin sa karsada. Gihatod dayon kini sa mga tagtungod ngadto sa Moalboal District Hospital apan nakabsan kini sa iyang kinabuhi gumikan sa grabing pagkadugmok sa iyang ulo nga napantok sa poste.

Matud pa ni Delica nga base sa pamahayag sa mga nakasaksi sa hitabo nasuta nila nga naka-inom ang biktima samtang puwerting kusoga nga nagpadagan sa iyang sakyanan nga bag-o pang gikuha niya gikan sa tindahan. (WC) (BANATNEWS)