Taga Dole midayeg sa programa ni Gwen

CEBU, Philippines - Nakadayeg kaayo ang mga opisyal sa   Department of Labor and Employment sa rehiyon-7 sa programa nga Obra Negosyo Eskwela ni Governor Gwendolyn Garcia.

Kini human ipasabot sa gobernador ang tinud-anay nga tinguha sa maong programa   nga alang   sa gagmay’ng mga magpapatigayon dinhi sa lalawigan sa Sugbo.

Si manlalaban Ma. Gloria Tango Regional, ang Regional Director of Department of Labor and Employment (DOLE)-7 atol sa iyang pagbisita ug paghatag og kortesiya ngadto sa gobernador nalipay kaayo sa nabati niya gikan sa gobernador.

Matud pa niya nga karon pa siya makasugat niining maong matang sa programa nga hiniusang gitambayayongan sa pribado ug pangpublikong buhatan.

Nakaingon si Tango nga talagsaon kaayo ang maong programa tungod kay ang pagtabang sa kagamhanan sa lalawigan ngadto sa mga gagmay nga negosyo dili lamang kutob sa paghatag og financial assistance sa mga negosyante kun dili pagtabang pa gyud aron mapalambo pa ang negosyo sa gagmay’ng magpapatigayon hangtud nga makabaton kini og kinitaan. Tungod niini gitahasan ni Tango ang usa sa iyang mga staff sa iyang buhatan nga moapil-apil na sa paglingkod sa Technical Working Group aron pormal nga makahatag og ayuda ang DOLE niini.

Nasayran nga adunay P6 milyones nga pundo ang rehiyonal nga buhatan sa DOLE alang sa 6 ka distrito sa lalawigan sa Sugbo nga gitagana alang sa pagpalambo sa gagmay’ng pamatigayon dinhi sa lalawigan. (BANATNEWS)